स्याङ्जामाः ठुलो भिषण हावाहुरी र असिनापानीले लाखौंको क्षति

स्याङ्जा : अचानक आएको धूलो सहितको हावाहुरी र असिनापानीले स्याङ्जामा लाखौं रुपैयाँ बराबरको क्षति पुगेको छ। बुधबार दिउसो आएको हावाहुरीले दर्जनौं घरलाई क्षति पुर्‍याएको छ। कयौं घर र विद्यालयका छाना उडाएका छन्। झ्यालका शिशा फुटेका छन्।

झण्डै पौने घण्टा जतिको तीव्र गतिको हावाहुरी र असिनापानीले खेतवारीमा लगाएको मकैलाई नराम्ररी प्रभाव पारेको छ। मौसमी तथा बेमौसमी तरकारी खेती र फलफूल नष्ट भएका छन्। भर्खर कोपिला लाग्दै गरेका सुन्तला र तरकारीखेतीलाई नष्ट पारेको पुतलीबजार नगरपालिका ६ ठूलाडिहीका नेमबहादुर रानाले बताए। भने, ‘ असिना पानीले सुन्तला र बेमौसमी तरकारी बालीमा झण्डै १ करोड बराबरको क्षति पुगेको छ।’ सो क्षेत्र सुन्तला उत्पादनको पकेट क्षेत्र हो। यहाँ मौसमी तथा बेमौसमी तरकारी खेती पनि गरिन्छ।

धूलोसहितको हावाहुरीका कारण पुतलीबजार नगरपालिका १ निवासी गणेश पाण्डेको टिनको छानो उडाएको छ। घरमा छाएको टिनको छानो बलो (टिनलाई अड्याउन प्रयोग गरिने काठ) सहित सबै उडाएर सडकमा पुर्‍याएको थियो।

पुतलीबजार नगरपालिका ३ स्थित काजीमान हरिटीका माविको टिनको छाना पनि उडाएको छ। यत्रतत्र ठाउँ ठाउँमा रुखहरू ढलेका छन्। ठाउँ ठाउँमा बिजुली र टेलिफोनका तार चुडिदा बिजुली र इन्टरनेट सुबिधा अवरुद्ध बनेको थियो।

स्याङ्जाका पुतलीबजार, भीरकोट, वालिङ्, गल्याङ्, फेदिखोला, आधीखोला लगायतका तहमा पनि हावाहुरी सहितको असीना पानीले अन्नबालीनाली, तरकारी र फलफूल र पुराना तथा कच्चीघरलाई क्षति पुर्‍याएको छ।

यसैबीच बंगालको खाडीको दक्षिण पूर्वी भागमा भएको ‘फानी’ नामक आँधीको प्रभाव नेपालको हिमाली क्षेत्रमा पर्ने सम्भावना भएकाले सावधानी अपनाउन मौसमविद्को आग्रह छ। – अन्नपूर्ण