विमानमा चढे किशोरी र अधबैंसे, एयरहोस्टेसलाई शंका लागे पनि बोल्न पाइनन् पछि बाथरुममा…..

सिएटल । अलास्का एयरलाइन्सको उडानमा २ वर्षअघि भएको एउटा घटनाको आज पनि चर्चा हुन्छ । विमानमा सवार एयर होस्टेसले एक किशोरीलाई बेचिनबाट बचाएकी थिइन् । ती किशोरी एक अधबैंसे व्यक्तिसँग विमानमा चढेकी थिइन् । उनका कपडा पनि सफा थिएनन् । उनलाई शान्त र डराएको देखेर एयर होस्टेसलाई शंका लाग्यो । उनले किशोरीसँग बोल्न चाहेकी थिइन् तर कुरा गर्ने अवसर पाइनन् । यद्यपि किशोरीले उनलाई आफ्नो परिस्थितिबारे जानकारी दिन एउटा आइडिया निकालिन् । त्यसपछि एयर होस्टेसले किशोरीको सफलतापूर्वक उद्धार गर्न ठूलो सहयोग गरिन् ।

एयर होस्टेस शैलाका अनुसार उनी २०१७ मा सिएटलबाट सन फ्रान्सिस्को जाने उडानमा ड्युटीमा थिइन् । उनको विमानमा उक अधबैंसे व्यक्ति एक किशोरीसँग चढे । ती अधबैंसेको कपडा व्यवस्थित थिए तर किशोरीका कपडा भने सफा पनि थिएनन् । सँगसँगै विमानमा चढेका २ जनाको कपडामा यति ठूलो अन्तर देखेपछि उनलाई शंका भयो । खाजा दिने बेलामा शैलाले किशोरीसँग बोल्न खोजिन् तर किशोरीले बोल्नु त परको कुरा उनीतिर हेर्दा पनि हेरिनन् । किशोरीको व्यवहार देखेर उनलाई ठूलै गडबडी भएको शंका भयो ।

शैलाले यसबारे आफ्ना २ सहकर्मीसँग पनि कुरा गरिन् । त्यसपछि उनका २ साथीले ती अधबैंसे व्यक्तिलाई कुरामा अल्झाउन थाले र शैलाले किशोरीको ध्यान आफूतर्फ आकर्षित गर्न प्रयास गरिन् । शैलाले किशोरीलाई बाथरुममा आउन इशारा गरिन् । शैलाले बाथरुममा एउटा पेन्सिल र कागजको टुक्रा राखिदिइन् । त्यसपछि शैला यो आशामा पर्खेर बसिन् कि किशोरीले उनको इशारा बुझेकी छिन् । तर, जब किशोरी बाथरुममा गइन् ती अधबैंसे व्यक्ति पनि उनीसँगै गए । यद्यपि यति हुँदाहुँदै पनि किशोरीले आफ्नो काम पूरा गर्न सफल रहिन् ।

किशोरीले कागजमा ‘आइ नीड हेल्प’ (मलाई सहयोगको आवश्यकता छ) लेखेकी थिइन् । किशोरीले लेखेको पढ्नासाथ शैलाले पाइलटलाई यसबारे जानकारी गराइन् । पाइलटले ग्राउण्ड कन्ट्रोलमा सम्पर्क गरेर यसबारे जानकारी दिए । पाइलटले जानकारी दिएपछि विमान ल्याण्ड गर्ने बेला एयरपोर्टमा ती अधबैंसे व्यक्तिलाई पक्राउ गर्नको लागि सुरक्षार्की विमानको ढोकामै पर्खेर बसेका थिए । ती किशोरीलाई बेच्नको लागि लगिएको अनुसन्धानमा खुल्यो ।

शैला आज पनि ती किशोरीको सम्पर्कमा छिन् । उनीहरु बेलाबेलामा कुराकानी गरिरहन्छन् । वेस्टर्न जर्नल नामक पत्रिकाका अनुसार ती किशोरीले अहिले आफ्नो पढाइ अगाडि बढाइरहेकी छिन् ।