मध्यविन्दुमा वन डढेलो नियन्त्रणका लागि समन्वय गोष्ठी

प्रियधन
चोरमारा । नवलपरासी पूर्व नवलपुरको मध्यविन्दु नगरपालिकामा वन डढेलो नियन्त्रणका लागि समन्वय गोष्ठी सोमबार सम्पन्न भएको छ ।
सव–डिभिजन वन कार्यालय भाग्रा रानीटार र डिभिजन वन कार्यालय नवलपुरको आयोजनामा सव–डिभिजन वन कार्यालय रानीटार अन्तर्गत पर्ने मध्यविन्दु नगरपालिकाका वनहरू बीच गोष्ठी गरिएको हो । गर्मीयाममा रुखका पात खस्ने तथा सामान्य हेलचेक्र्याईंबाट पनि वनमा आगो लाग्ने भएकाले समिति र उपभोक्तालाई सचेत गराउनका लागि कार्यक्रम आयोजना गरिएको सहायक वन अधिकृत दुर्गादत्त कंडेलले जानकारी दिनुभयो । एकदिने गोष्ठीमा वनमा आगो लाग्नुका कारण, यसको परिणाम, सावधानीका उपायहरु, पूर्व तयारी तथा उपभोक्ता सचेतनाका विषयमा छलफल गरिएको फरेस्टर सागर चन्द्र ढुंगानाले जानकारी दिनुभयो ।

स्थानीय सामुदायिकहरु बीचको आपसी समझदारी र समन्वयबाट वन डढेलो लाग्न नदिन सामुदायिक वनहरु बीच छलफल भएको विजय सामुदायिक वन उपभोक्ता समुहका अध्यक्ष घनश्याम पौडेलले जानकारी दिनुभयो ।
वनमा सके सम्म डढेलो लाग्नै नदिने तथा लागिहालेको सबै वनहरु बीच समन्वयबाट तत्काल नियन्त्रण गर्नका लागि योजना निर्माण भइरहेको उहाँले बताउनुभयो । सोमबारको भेलाले वन डढेलो नियन्त्रणका लागि मध्यविन्दु नगरपालिकासंग सवारी उपलब्ध गराउन समेत माग गरेको छ । नगरपालिकाको कोषबाट शसस्त्र प्रहरी बल बेस क्याम्प चोरमाराका लागि एउटा ट्रिप्पर उपलब्ध गराउन वन समूहहरुले आग्रह गरेका हुन् ।
सामुदायिक वनहरु सिमा भन्दा माथि उठेर वन डढेलो नियन्त्रणमा सबै सामुदायिक वनहरुबीच समन्वय हुने वातावरण तयार गर्न यस्ता छलफलहरु महत्वपूर्ण हुने कालिकोटे सामुदायिक वन उपभोक्ता समुहका अध्यक्ष नेत्र बहादुर अधिकारीले बताउनुभयो ।
कार्यक्रमका प्रमुख अतिथि मध्यविन्दु–७ का वडा अध्यक्ष अमृत प्रसाद ज्ञवालीले सामुदायिक वनहरुले वन डढेलो नियन्त्रणको लागि गरेको प्रयासहरु निकै उदाहरणीय रहेको बताउनुभयो । सामुदायिक वनहरु बीचको समन्वय, स्थानीय सरकार र सरकारी निकायहरुको समेत सहकार्यमा अगाडी बढ्दा वन डढेलो नियन्त्रण हुन सक्ने उहाँले बताउनुभयो । वन डढेलो नियन्त्रणको लागि सामुदायिक वनहरुले माग गरेको सवारीको सम्बन्धमा आफु गम्भीरताका साथ नगरपालिकाको ध्यानाकर्षण गराउने उहाँले बताउनुभयो ।
कार्यक्रममा वैज्ञानिक वन राष्ट्रिय उपभोक्ता महासंघका महासचिव मधुविलास अधिकारी, शसस्त्र प्रहरी बल बेस क्याम्प चोरमाराका प्रमुख मुकुन्द जिसी , तमसरिया प्रहरी चौकी चोरमाराका प्रमुख सहित विभिन्न सामुदायिक वन समूहका अध्यक्ष तथा प्रतिनिधिहरुको सहभागिता रहेको थियो ।
सव डिभिजन वन कार्यालय भाग्रा रानीटार अन्तर्गत १८ वटा सामुदायिक वन र एउटा धार्मिक वन रहेका छन् तीमध्ये १६ वटा सामुदायिक वन समूहका प्रतिनिधि उपस्थित थिए । कार्यक्रम सव डिभिजन वन कार्यालय रानीटारका प्रमुख सहायक वन अधिकृत दुर्गादत्त कंडेलको अध्यक्षता तथा मध्यविन्दु ७ का वडाध्यक्ष अमृत प्रसाद ज्ञवालीको प्रमुख आतिथ्यतामा सम्पन्न भएको हो ।