नवलपुरमा १ सय ५५ क्षेत्रमा कृषि गणना

गंगा बिश्वकर्मा, कावासोती । नवलपरासी पूर्व (नवलपुर) जिल्लामा एक सय ५५ क्षेत्रमा कृषि गणना गरिने भएको छ । सातौँ राष्ट्रिय कृषि गणना अन्तर्गत जिल्लामा रहेका आठ वटा पालिकालाई सो क्षेत्रमा विभाजन गरी गणना गर्न लागिएको हो ।
जिल्ला कृषि गणना कार्यालय नवलपुरका अनुसार गैंडाकोट नगरपालिकामा २१ , देवचुली नगरपालिकामा २२ , कावासोती नगरपालिकामा २४, मध्यविन्दु नगरपालिकामा २३ , बिनयी त्रिवेणी गाउँपालिकामा २० , हुप्सेकोट गाउँपालिकामा १५ , बौदीकाली गाउँपालिकामा १३ र बुलिङ्गटार गाउँपालिकामा १७ वटा क्षेत्र कायम गरिएको छ ।
जिल्ला कृषि गणना कार्यालय नवलपुरका अधिकृत रेणु कुमारी घिमिरेका अनुसार हरेक १०/१० वर्षमा गरिने कृषि गणना सम्पन्न गर्नका लागि जिल्लामा ६९ जना कर्मचारी परिचालन गरिने छ । जसमा १४ जना सुपरिवेक्षक र ५५ जना गणक परिचालन गरिन छ । उनीहरुले ४५ दिन काम गर्ने छन् । गणकलाई यही चैत २४ गतेसम्म करारमा नियुक्त गरेर काम लगाइने छ । गणक र सुपरिवेक्षकलाई चैत २५ गतेदेखि आगामी वैशाख २ गतेसम्म तालिम दिइने छ भने सुपरिवेक्षकलाई मात्र थप १ दिन गरि ३ गते सम्म तालिम दिइने छ । तालिमपछि वैशाख ६ गतेबाट जेठ १९ गतेसम्म तथ्याङ्क सङ्कलनमा खटाइने उहाले जानकारी दिनुभयो ।
एउटा सुपरिवेक्षकले ४ जनासम्म गणकलाई हेर्ने अधिकृत घिमिरेले बताउनुभयो । गणकले एक गणना क्षेत्रमा २५ परिवारको तथ्याङ्क सङ्कलन गर्ने छन् । उनीहरुले विभिन्न १३ विधामा प्रश्नावली भर्ने छन् । यस्तै वडास्तरीय सामुदायिक प्रश्नावलीसमेत समेटिएका विषय रहने छन् ।
। गणनाका क्रममा कृषकले भोगचलन गरेको जग्गाको आकार, जग्गाको उपभोग र उपयोग बाली लागेको जग्गाको क्षेत्रफल, मुख्य बालीको उत्पादन र सिँचाइको विवरण लिइने छ । यस्तै कृषि सामग्री र औजारको उपयोग, पशुपन्छीको सङ्ख्या, आहारसम्बन्धी विवरण, कृषि कार्यमा संलग्न जनशक्ति, लिङ्गका आधारमा कृषि जग्गाको स्वामित्वको अवस्थाबारे गणकले तथ्याङ्क सङ्कलन गर्ने छन् । कृषि वन, कृषि ऋण, बीमा अनुदान, कृषि कार्यमा जलवायु परिवर्तनका प्रभाव, हरितगृह पद्धतिको प्रयोग माटो परीक्षण कृषि बजारसम्मको पहुँच, कृषि अवशेष र फोहोरको व्यवस्थापनजस्ता विषयमा तथ्याङ्क सङ्कलन गरिने उहाँले बताउनुभयो ।
जिल्लामा कृषि गणना कार्यालय चैत १ गते स्थापना गरी काम सुरु गरिएको उहाँले जानकारी दिनुभयो ।