कोल्हुवा खानेपानीद्वारा जनप्रतिनिधिलाई सम्मान

चोरमारा । कोल्हुवा खानेपानी तथा सरसफाई उपभोक्ता समित मध्यविन्दु–२ कोल्हुवाले मध्यविन्दु नरपालिकाका नगरप्रमुख सहित जनप्रतिनिधिहरुलाई सम्मान गरेको छ । स्थानीय तह निर्वाचन पस्चात नगरपालिकामा जनप्रतिनिधिको रुपमा निर्वाचित भएपछि आफ्नो कार्यक्षेत्र भित्र खानेपानीको सुलभ पहुँचको लागि गरेको योगदानको धन्यवाद व्यक्त गर्दै समितिले नगर प्रमुख चन्द्र बहादुर राना, उपप्रमुख ओम कुमारी महतो, प्रमुख प्रशासकीय अधिकृत बासुदेव खनाल सहित मध्यविन्दु १, २ र ३ का जनप्रतिनिधिहरुलाई सम्मान गरेको हो । समितिको कार्यक्षेत्र भित्र खानेपानीको सहज पहुँच स्थापना गर्न पाँच वर्षको अवधिमा नगरपालिकाबाट एक करोड ३४ लाख ५० हजार रुपैयाँ बजेट प्राप्त भएको समितिका अध्यक्ष श्रीधर शर्माले बताउनुभयो । संस्थासंग निरन्तर सहकार्य र आवश्यक सहयोगको लागि धन्यवाद व्यक्त गर्दै उहाँले खानेपानीको शुद्धिकरण र फोहर व्यवस्थापनको लागि आवश्यक कार्ययोजना निर्माणको काम भइरहेको समेत जानकारी दिनुभयो । समितिले उपभोक्ताहरुलाई खानेपानीको सहज पहुँच संगै घरमा कसेराबारी निर्माणमा सहुलियतमा खानेपानी वितरण गरिरहेको उहाँले बताउनुभयो ।

सम्मान ग्रहण पस्चात मध्यविन्दु नगरपालिकाका नगर प्रमुख चन्द्र बहादुर रानाले नगरपालिका स्थापनाको समय र आजको दिनमा कोल्हुवा खानेपानीको संस्थागतसंगै यसले खानेपानीको वितरणमा गरेको बिकास उत्कृष्ट रहेको बताउनुभयो । नगरपालिकाका अन्य खानेपानीहरु तुलनामा सहुलियत दरमा खानेपानीको वितरण गरेको भन्दै उहाँले संस्थाका अध्यक्ष शर्मा सहित सबै कार्यसमितिलाई धन्यवाद समेत प्रकट गर्नुभयो ।

मध्यविन्दु नगरपालिकाका उपप्रमुख ओमकुमारी महतोले कोल्हुवा क्षेत्रका स्थानीयले खानेपानीको अभावमा भोग्नुपरेको समस्याको स्मरण गर्दै अहिले सबै घरमा शुद्ध पिउने पानीको धारा जडान हुने अवस्थामा आएको बताउनुभयो । मध्यविन्दु नगरपालिकाका प्रमुख प्रशासकीय अधिकृत बासुदेव खनालले नगरपालिकाको तर्फबाट निरन्तर रुपमा खानेपानी तथा सरसफाईको क्षेत्रमा काम भइरहेको भन्दै कोल्हुवा खानेपानीले गरेका कार्यहरु उत्कृष्ट रहेको बताउनुभयो । उहाँले समिति मार्फत नै गठन गरिएको सहकारी सहित निकट भविष्यमा गर्न खोजिएका कार्यहरुको योजना निर्माण गर्दै गर्दा स्थापना हुने अन्य संस्थाहरुको कार्यक्षेत्रमा हस्तक्षेप वा कार्यहरु बाझिने स्थीति नआउन भन्नेम सर्तक बन्न अनुरोध समेत गर्नुभयो । सम्मान कार्यक्रममा मध्यविन्दु १ का वडा अध्यक्ष लिलाराम थारु, २ का वडा अध्यक्ष नारायण पौडेल, ३ का वडा अध्यक्ष अमर बहादुर महतो सहित कार्यपालिका सदस्य र वडा सदस्यहरुलाई सम्मान गरिएको हो । कार्यक्रमको सञ्चालन समितिका सहसचिव सुवास नेपालले गर्नु भएको थियो ।