प्रचण्डले छोरीको लागि माओवादी आन्दोलन विघटनको अवस्थामा : एमाले उपमहासचिव ज्ञवाली

चोरमारा । नेकपा एमाले मध्यविन्दु नगरपालिकाले आफ्नो चुनावी प्रतिबद्धता पत्र सार्वजनिक गरेको छ । नेकपा (एमाले) का उपमहासचिव प्रदिप ज्ञवालीले आज प्रतिबद्धता पत्र सार्वजनिक गर्नु भएको हो । घोषणा पत्र सार्वजनिक गर्दै ज्ञवालीले मध्यविन्दु नगरपालिकामा नेकपा एमालेको नेतृत्व स्थापित गर्न आआफ्नो स्थानबाट परिचालित हुन पार्टी कार्यकर्तालाई निर्देशन दिनुभयो । विश्वराजनितिमा नै फरक परिदृष्यको रुपमा प्रतिपक्षका विरुद्ध सत्तापक्षले गठबन्धन गरेको भन्दै सत्तागठबन्धन नेकपा एमालेसंगको पराजित मनस्थितिको उपज भएको टिप्पणी गर्नुभयो । मध्यविन्दु नगरपालिका सहित देशभर नेकपा एमालेको पक्षमा जनलहर सृजना भएको बताउदै उहाँले यस पटकको स्थानीय तह निर्वाचनमा एमाले पुनः पहिलो पार्टीको रुपमा स्थापित हुने दावी व्यक्त गर्नुभयो । केपी शर्मा ओलि नेतृत्वको सरकारको समयमा भएका बिकास निर्माण र समृद्धि आम जनताले महसुस गरिरहेको भन्दै स्थानीय तह निर्वाचनको पूर्वसन्ध्यामा मधेष प्रदेश सहित देशभर आम सर्वसाधारण देखि दलका उच्च तहका व्यक्तिहरु समेत एमालेमा प्रवेश गर्ने लहर शुरु भएको बताउनुभयो । एमालेका बिरुद्ध प्रतिपक्षले लगाउने गरेको आरोपहरु चिर्दै देशको नक्सा नै बदल्ने गुमेको भूमिलाई देशको नक्सामा समावेश गर्ने एक मात्रै पार्टी एमाले हो भन्ने बुझाई आम जनता सम्म प्रवाह हुन आवश्यक रहेको बताउनुभयो ।

उहाँले नेपाली कांग्रेसको गर्विलो इतिहासलाई जोगाउन शेर बहादुर देउवाले प्रचण्ड र माधव नेपालको टेको टेक्ने दिन आएको टिप्पणी गर्नुभयो । १० वर्षे जनयुद्धको जगमा स्थापित माओवादी आन्दोलन र पार्टीलाई प्रचण्डले परिवारवाद र एक थान छोरीको लागि विघटनको अवस्थामा पु¥याएको बताउनुभयो । कार्यक्रममा नेकपा एमाले केन्द्रीय सल्लाहाकार समिति सदस्य चन्द्रमणी खरालले एमालेले यस पटकको स्थानीय तह निर्वाचनबाट विगतको बिरासत फिर्ता ल्याउने बताउनुभयो । एमाले प्रदेश कमिटी सदस्य एवम् गण्डकी प्रदेश सभा सदस्य जनकलाल श्रेष्ठले एमालेको पक्षमा सृजना भएको जनमतबाट कांग्रेस सहितका दलहरु आत्तिएको टिप्पणी गर्नुभयो ।

कार्यक्रममा एमालेका तर्फबाट मध्यविन्दु नगरपालिकाका मेयर पदका उम्मेदवार भिमलाल अधिकारीले एमालेको विजय पस्चात नगरपालिकाको समृद्धि प्रत्यक्ष जनताले महसुस गर्ने बताउनुभयो । सुशासन, आवश्यक बिकासमा आफ्नो ध्यान केन्द्रीत हुने उहाँले बताउनुभयो ।एमाले मध्यविन्दु नगर इञ्चार्ज बाबुराम पाण्डेले एमाले आफ्नो घोषण पत्रमा समावेश गरेका सबै बिषयहरुको कार्यान्वयन गर्ने बताउनुभयो । एमाले मध्यविन्दुले आफ्नो प्रतिबद्धता पत्रमा शिक्षालाई पहिलो प्राथमिकतामा राखेको छ । निशुल्क र गुणस्तरिय शिक्षाको लागि नगरको कुल बजेटको न्यूनतम २० प्रतिशत रकम शिक्षा क्षेत्रको लागि विनियोजन गर्ने प्रतिबद्धता पत्रमा उल्लेख छ ।

यस्तै स्वास्थ्य तथा सरसफाई, कृषि, सडक, नदी तथा खोला तटबन्धन, खानेपानी, सरसफाई र ढल व्यवस्थापन, विद्युत, वैकल्पीक उर्जा, प्रदुषण नियन्त्रण, सञ्चार प्रविधि, फोहरमैला व्यवस्थापन, पर्यटकीय क्षेत्र, पार्क होमस्टे, बसपार्क, सार्वजनिक स्थलको संरक्षण, खेलमैदान निर्माण तथा खेदकुद, दाहसंस्था स्थल, धार्मिक ऐतिहासिक स्थल, सुकुम्बासी, अव्यवस्थित क्षेत्र, लक्षित वर्गा समावेशी बिकास, गरिब र विपन्नका लागि घर निर्माण, संरक्षण प्रणाली प्रवद्र्धन, सामुदायिक वन, प्राकृतिक सम्पदा, सहकारी, सुशासन, आवास क्षेत्र र पूर्वाधार निर्माण, आधुनिक नगर, विपद् व्यवस्थापन, उद्योग, हाट बजार, जेष्ठ नागरिक एमालेको सरोकार, मानव वन्यजन्तु द्वन्द्व व्यवस्थापन, बिदेशी अनुभवः स्वदेशमा पौरख, विकृति विरुद्धको अभियान, जातीय उत्थान, भाषा, साहित्य र संस्कृति क्षेत्र, युवा विशेष कार्यक्रम, बालबालिका विशेष कार्यक्रम, महिला विशेष कार्यक्रम, महत्वाकांक्षी र ठुला योजनाहरु, नीति कानुन तथा योजना तर्जुमा एवम् कार्यान्वयन गरी ३४ वटा विषयलाई एमालेले आफ्नो घोषणा पत्रमा समावेश गरेको छ ।