चुनावले नवलपुरको आर्थिक क्षेत्र चलायमान

गंगा बिश्वकर्मा

कावासोती । स्थानीय तहको निर्वाचन हुनका लागि अब ६ दिन मात्र बाँकी रहेको छ । बैशाख ३० गते हुने स्थानिय तहको निर्वाचनमा मत माग्नका लागि उम्मेदवारसंगै कार्यकर्ताहरु घरदैलो अभियानमा जुटेका छन् । नेपाली कांग्रेस, नेकपा (एमाले), नेकपा (माओवादी केन्द्र), राष्ट्रिय प्रजातन्त्र पार्टी, नेशनल मंगोल अर्गनाइजेशन लगायत अन्य राजनीतिक दल र स्वतन्त्र उम्मेदवार समेत भोट माग्न गाउँ पसेका छन् । प्रचार–प्रसारलाई तिब्र बनाएको उनिहरु गाउँ–गाउँ, टोल–टोल पस्दा नवलपुरको व्यावसायिक क्षेत्रमा पनि चहलपहल बढ्न थालको छ । उम्मेदवारले भेटघाट र घरदैलोलाई प्रभावकारी बनाइरहदा यसको प्रत्यक्ष लाभ व्यबसायीक क्षेत्रले पाउन थालेको हो ।
कावासोती–२ मा रहेको न्यु मौलाकालिका मिट सपका सञ्चालक विश्वराज बिष्टले आजभोलि दैनिक १ सय ६० देखी ७० किलो सम्म मासु बिक्री गर्ने गरेको सुनाए, जबकी निर्वाचनको चहलपहलभन्दा अगाडी बढिमा १ सय सम्म मात्र दैनिक बिक्री हुने गर्दथ्यो । उनले भने– “सबैजसो दलका उम्मेदवार लगायत कार्यकर्ता आउजाउ गर्ने भएकाले मासुको माग दैनिक रुपमा बढेको छ ।” एउटै दलले दैनिक ४० किलो सम्म मासु खरिद गर्ने गरेको उनले बताए ।
उता मध्यविन्दु नगरपालिका वडा नम्बर ७ मा रहेको सुसन किराना पसलका सञ्चालक सुवास पराजुलिको पनि व्यापार अहिले बढेको छ ।
दैनिक रुपमा दुई/तिन बोरा चामल बिक्री हुनेमा चुनावी सरगर्मीले बढेपछि छ÷सात बोरा बिक्री हुने गरेको बताए । उनले भने “गाउँमा अरु किराना पसलको कस्तो व्यापार छ थाहा छैन् तर मेरो भने दिनमा ७/८ बोरा चामल बिक्री हुन्छ ।” उनले फेरी थपे “यस्तै व्यापार सधै हुन्थ्यो त व्यवसायबाट सन्तुष्ट हुन्थ्यौं यो त चुनाव नभ्याएसम्म मात्रै त हो ।”
निर्वाचनको चहलपहलले मुख्य रुपमा होटल रेष्टुराँका व्यापार बढ्न थालेका छन् । धेरै मतदाता माझ पुग्ने उद्देश्यले घरदैलोलाई जोड दिएका उम्मेदवार लगायत कार्यकर्ताहरुलाई खाजा, नास्ता खुवाँउने गरेकाले गाउँ टोलमा रहेका होटल रेष्टुराँदेखि बजारका ठूला होटल रेष्टुराँमा पनि यसको प्रभाव देखिन थालेको हो ।
हुप्सेकोट गाउँपालिका वडा नम्बर ४ कर्नर साइटका सञ्चालक राजु रेग्मी पनि अहिले आफ्नो व्यापार बढेको भन्दै खुसी भएका छन् । उम्मेदवारहरुले ऋण धन गरेर भएपनि चुनावमा विशेष खाजामा खर्च गर्ने भएकाले आफ्नो होटेलको ग्राहक बढेको बताउँछन् । उम्मेदवार र कार्यकर्ताहरु चुनावका लागि आउँदा कहिले खाजा, कहिले पानी गरि पहिलेको तुलनामा बढि ग्राहक थपिएको उनको अनुभव छ ।
चुनावले आफ्नो व्यापार बिगतको तुलनामा चलायमान भएकाले व्यापार राम्रो भएको उनले बताए । उनले अन्य गाउँगाउँमा रहेका साना रेष्टुराँमा पनि चहलपहल वढेको बताउँदछन् ।
कावासोतीमा रहेको सोमनाथ बाबा फेलेक्स प्रिन्टका सञ्चालक हरि प्रसाद ढुंगानाले समेत यो समयमा दोव्वर प्रिन्ट निकाल्नु परेको बताएका छन् । बिभिन्न फरक–फरक पार्टिका फोटो प्रिन्ट निकाल्दैमा उनी अहिले व्यस्त छन् । उनले भने “आशातित् व्यापार भएको त छैन तर चुनावी सरगर्मी पछिको व्यापार सान्तोषजनक छ ।”