नवलपुरमा १६ हजार बढि पशुमा लगाईयो लम्पी स्किन रोगविरुद्धको खोप

मीनाक्षी कंडेल,कावासोती । नवलपुर जिल्लामा १६ हजार बढि गाईभैंसीमा लम्पी स्किन रोगविरुद्धको खोप लगाइएको छ । नवलपुरसहित देशैभर गाईभैंसीमा लम्पी स्कीन रोग सङ्क्रमण दर बढ्दै जान थालेपछि यसको रोकथामका लागि नवलपुर जिल्लामा १६ हजार ७ सय ७३ पशुचौपायमा खोप लगाईएको हो । भेटेनरी अस्पताल तथा पशु सेवा विज्ञ केन्द्र नवलपुरद्धारा ६ हजार खोप जिल्लाका बिभिन्न स्थानिय तहबाट १० हजार १सय ६८ कृषक स्वंयमले ५सय ९५ गरी जम्मा जिल्लामा १६हजार ७ सय ७३ पशुचौपायमा खोप दिईएको भेटेनरी अस्पताल तथा पशु सेवा विज्ञ केन्द्र नवलपुरका प्रमुख डा.ऋषभ गुरागाँईले जानकारी दिए ।

जिल्लामा लम्पी स्कीन रोगबाट ६ हजार ९ सय ५२ गाईभैंसी यस रोगबाट संक्रिमत छन् भने ५ सय २१ पशुचौपायको मृत्यु भएको कार्यालय प्रमुख गुरागाँईले जानकारी दिए । भेटेरिनरी अस्पताल तथा पशु सेवा विज्ञ केन्द्रले ५ लाख बराबर र स्थानीय तहहरुले सोही मात्रामा औषधीहरु खरिद गरी कृषकलाई वितरण गरिएको उनले बताए ।

यस रोगको संङ्क्रमण रोकथाम तथा न्यूनिकरणका लागि कार्यालयले जिल्लमाा हुने गाईभैंसीको आयात निर्यातलाई नियमन तथा दर्तावाल पशु चिकित्सकहरुले स्वास्थ्य परिक्षण प्रमाणिकरण गरेका पशुहरुको मात्र आयात निर्यातको अनुमति कार्यालयले दिने गरेको कार्यालयले जनाएको छ । रोगको विवरण संकलन, संक्रमित पशुको उपचार तथा खोप कार्य सबै जिल्ला भेटेरिनरी अस्पताल र स्थानीय तह पशु सेवा शाखाको सहकार्यमा आवश्यक समवन्य साथै रोकथामको पहल भईरहेको कार्यालय प्रमुख गुरागाँईले बताए ।