जिल्ला प्रशासन कार्यालय नवलपुरद्धारा गैडाकोटमा बजार अनुगमन

नवलपुर ।जिल्ला प्रशासन कार्यालय नवलपुरले गैँडाकोटमा अनुगमन गरेको छ । विभिन्न चाडपर्व नजिकिरहेको हुँदा बजारमा चामलको आपूर्तिको अवस्था बुझ्ने तथा उपभोग्य सामाग्री बेचबिखनको अवस्था बुझ्ने गरि प्रशासन कार्यालयको नेतृत्वमा बजार अनुगमन गरिएको हो ।सो क्रममा जिल्लाको गैँडाकोटमा रहेको शिवकृपा स्टोरबाट म्याद गुज्रिएका विभिन्न उपभोग्य सामाग्री बरामद गरिएको जिल्ला प्रशासन कार्यालय नवलपुरका प्रशासकीय अधिकृत भरत सापकोटाले बताए। ।अनुगमनका क्रममा स्टोरमा बिक्रीका लागि राखिएको म्याद गुज्रिएका सामाग्री फेला पारेपछि बरामद गरिएको प्रशासकीय अधिकृत सापकोटाले बताउनुभयो । पसलमा धेरै प्रकारका सामाग्री म्याद नाघेको पाइएकाले त्यस्ता सबै सामाग्री बरामद गरिएको हो ।पसलमा म्याद नाघेका सामाग्री भेटिनुका साथै दर्ता प्रमाण पत्र, खरिद तथा बिक्री बिल समेत उपलब्ध गराउन नसकेपछि उक्त पसललाई कारवाही गर्ने प्रक्रियामा गइएको पर्यटन तथा उद्योग कार्यालयका प्रमुख सागर खनालले बताए । बुधबार सबै कागजात सहित कार्यालय आउने गरि पत्र काटिएको र कागजातको अवस्था हेरि कानून अनुसार आकर्षित हुने कारवाही गरिने उहाँले बताए। म्याद नाघेको सामाग्री बेचेको कारवाही सहित अन्य कागजपत्रको अवस्था चेकजाँच गरि थप कारवाही गरिने उहाँले बताए।जिल्ला प्रशासन कार्यालयका सहायक प्रमुख जिल्ला अधिकारी सुवास कुमार लामिछाने, पर्यटन तथा उद्योग कार्यालयका प्रमुख सागर खनाल, प्रहरी, उद्योग वाणिज्य संघका प्रतिनिधि लगायतको सहभागितामा अनुगमन गरिएको थियो ।

उपभोक्ताको स्वास्थ्यमा खेलबाड गर्ने गरि कम गुणस्तर तथा म्याद गुज्रिएका कुनैपनि सामाग्री बिक्री बितरण नगर्न सहायक प्रमुख जिल्ला अधिकारी सुवास कुमार लामिछानेले विक्रेतालाई अनुरोध गरे । अनुगमनका क्रममा त्यस्तो अवस्था फेला पारे जो कोही कारवाहीको भागिदार हुने उनले बताए। उपभोक्तालाई समेत उपभोग्य सामाग्री खरिद गर्दा उत्पादन मिति तथा प्रयोगको अन्तिम मिति हेरर मात्र खरिद गर्न आग्रह गरे ।अनुगमन टोलीले आजै गैँडाकोटमा रहेको जय श्री फुड प्रालिको समेत अनुगमन गरेको छ । मुख्य गरि चामलको आपूर्तिको अवस्था र मूल्यको अवस्था कस्तो रहेको छ भनेर टोलीले उद्योगसँग बुझेको थियो । सो क्रममा उद्योगका म्यानेजर अमित अग्रवालले अहिले चामलको अभाव नरहेको बताए।। उद्योगले निरन्तर चामलका आफ्ना विभिन्न ब्रान्डहरू उत्पादन गर्ने र बजार पठाउने काम गरिरहेकाले चामल पर्याप्त मात्रामा रहेको म्यानेजर अग्रवालले बताए। तत्काल मूल्यमा समेत कुनै परिवर्तन नभएको उनको भनाई रहेको थियो ।गत बैशाख र हालको मूल्य तुलना गर्दा केहि मूल्य वृद्धि भएको भएपनि ,तत्काल उत्पादकले मूल्यभने नबढाएको बताएका छन् ।चामल उत्पादन स्थलमा ठूलो मात्रामा मूल्यमा कुनै परिवर्तन नआएपनि बजारको हल्ला र उत्पादन देखि उपभोक्ता सम्म पुग्दा बिचमा धेरै वितरक हुँदा चामलको मूल्य बढेको देखिएको छ ।बजारमा पर्याप्त मात्रामा चामल रहेकाले तत्काल उपभोक्ताले अधिक सञ्चित गर्नुपर्ने अवस्था नरहेको पर्यटन तथा उद्योग कार्यालयका प्रमुख खनालले बताए ।।