रडले हानेर श्रीमतीको हत्या, दुई जना घाइते

दाङ  ।दाङको हलवारमा रक्सीले मातेका एक व्यक्तिले रड प्रहार गरि श्रीमतीको हत्या गरेका छन् । तुलसीपुर उपमहानगरपालिका – ४ तल्लो हलवारका ४३ वर्षीय पेण्डुवा चौधरीले श्रीमती ४२ वर्षीया लक्ष्मी चौधरीलाई टाउकोमा रड प्रहार गरि हत्या गरेको प्रहरीले जानकारी दिएको छ । इलाका प्रहरी कार्यालय तुलसीपुरका प्रमुख डिएसपी ठाकुरप्रशाद पोखरेलको नेतृत्वमा गएको २० जनाको प्रहरी टोलीले हत्या आरोपी पण्डुलेलाई शनिवार राति नै नियन्त्रणमा लिएको थियो ।

शनिबार राति सवा १० बजेतिर मदिराले मातेका पेण्डुले घर भित्रै श्रीमती लक्ष्मीलाई स्टिलको रडले टाउकोमा प्रहार गरेको र उनको घटनास्थलमै मृत्यु भएको जिल्ला प्रहरी प्रवक्ता डिएसपी जनकबहादुर मल्लले जानकारी दिनुभयो । पण्डुले श्रीमतीको हत्या पछि आफ्नी श्रीमती हराएको भन्दै खोजी गरिदिन छिमेकीलाई गुहारेका थिए । सहयोगका लागि पुगेका दुई छिमेकी माथिपनि पण्डुले रड प्रहार गरि घाइते तुल्याएका थिए ।

घाइते छिमेकी एक युवा र एक महिला भने उपचार पछि राति नै घर फर्किसकेको प्रहरीले जानकारी दिएको छ।