यी उपमेयरले बोलिन् छाडा बोली : पत्रकारलाई भनिन् – ‘त्यो साला को हो ?’

धनगढी। कैलाली जिल्लाको लम्कीचुहा नगरपालिकाको उपमेयरमा पूर्व एमालेबाट निर्वाचित टीका थापाले छाडा बोली बोल्दै पत्रकारलाई ‘त्यो साले को हो ?’ भनेर सोधेकी छन् ।

कैलालीको लम्कीचुहा नगरपालिका–४ की एक महिला सदस्यले अनैतिक सम्बन्ध राखेको आरोप लागेपछि स्थानीयले मेयर र उपमेयरले गलत भूमिका खेलिरहेको भन्दै आरोप लगाइरहेका थिए । मेयर र उपमेयर लगायतका जनप्रतिनिधि महिला सदस्य उर्मिला बगालेमगरलाई जोगाएर उनका श्रीमानलाई फसाउन सक्रिय भएको सूचना धनगढीको दिनेश खबरको समाचार शाखामा आएपछि पत्रकारले शुरूमा मेयर महादेव बजगाईंलाई फोन गरे ।

तर उनले फोन नउठाएपछि उपमेयर टिका थापालाई फोन गर्दा उनले फोन उठाइन् । पत्रकार नवराज पनेरुले आफ्नो र आफू काम गर्ने सञ्चारमाध्यमको परिचय दिँदै नगरपालिकाको आधिकारिक धारणा माग्दै पत्रकारले सोधे, ‘वडा सदस्यको केशमा तपाईंहरूले गलत भूमिका निभाउँदै हुनुहुन्छ भन्ने आरोप लागेको छ नि !’

उपमेयर थापाले आक्रोशित हुँदै छाडा शब्दमा भनिन्, ‘तपाईलाई त्यस्तो कुरा भन्ने त्यो साला को हो ?’ फेरि पत्रकारले भने, ‘उपमेयर हुनुहुन्छ कमसेकम मिडियामा बोल्दा त सभ्य भाषाको प्रयोग गर्नुस् न !’

सम्झाउन खोज्दा उपमेयर थापाले फोन काटिदिएको समाचार दिनेशखबर डटकमले प्रकाशित गरेको छ । अर्काे पटक फोन गर्दा उनले फोन नै उठाइनन् ।