पाँचथर हत्याकाण्ड : हत्यामा प्रयोग गरिएको खुकुरी, लुगा र झोला भेटियो

काठमाडौं,जेठ ७ – पाँचथरको मिक्लाजुङ गाउँपालिका–३ आरुबोटेस्थित दुई परिवारका नौजनाको हत्या प्रकरणमा प्रहरीले अनुसन्धानको सुई बमबहादुर फ्याकका कान्छा ज्वाइँ मानबहादुर माखिमतर्फ सोझाएको छ । सोमबार राति धनराज सेर्मा र बमबहादुरका परिवारका नौजनाको हत्या भएको घटनामा प्रहरीले मानबहादुरतर्फ अनुसन्धान केन्द्रित गरेको हो ।

सोमबार राती हत्या गरिएका बमबहादुर फियाकका कान्छा ज्वाँइले आत्महत्या गरेको ठाउँ नजिकै रगतमा लतपतिएको खुकुरी,लुगा र झोला भेटिएका छन् । बमबहादुर र उनका माइला ज्वाइँ धनबहादुरको परिवारका ९ जनाको हत्या भएको थियो। दुई परिवारको घर १५ मिनेटको पैदल दुरीमा छ।

उक्त घटनापछि बमबहादुरका कान्छा ज्वाइँ मानबहादुर माखिम पनि आफ्नो गाउँभन्दा लगभग डेढ किलोमिटरको दुरीमा रहेको मलेदोको रूखमा झुण्डिएको अवस्थामा फेला परेका थिए। उनी झुण्डिएको ठाउँभन्दा २ सय मिटर जति वर रहेको भिरजस्तो ठाउँमा रगत लतपतिएको खुकुरी, दाप, लुगा र झोला भेटिएको प्रहरीले जनाएको छ ।