दार्चुलामा मिनिबस दुर्घटना, २ को मृत्यु, १९ घाइते

दार्चुला । जिल्लाको मालिकार्जुन–३, तेर्थालेकमा शुक्रबार बिहान यात्रुवाहक मिनीबस दुर्घटना हुँदा २ जनाको मृत्यु भएको छ भने १९ जना घाइते भएका छन् ।

मालिकार्जुन मन्दिरको जात्राबाट दार्चुला सदरमुकाम खलंगातर्फ गइरहेको म १ ख ४३६ नम्बरको मिनीबस बिहान ३ बजे दुर्घटनामा परेको डीएसपी नवराज अधिकारीले जानकारी दिए ।

दुर्घटनामा परी ज्यान गुमाएका ५५ वर्षीय अनील पालको पहिचान खुले पनि अर्का १ जनाको भने सनाखत हुन सकेको छैन । प्रहरीका अनुसार, पाल भारतीय नागरिक हुन् । दुर्घटनामा १९ जना घाइते छन् । तीमध्ये ४ जनाको को जिल्ला अस्पतालमा उपचार भइरहेको छ भने बाँकी १५ लाई गोकुलेश्वर अस्पताल लगिएको छ ।

बसमा कति जना सवार थिए भन्ने यकिन भइसकेको छैन । बस दुर्घटना भएको खबर पाएसँगै नेपाल प्रहरी, सशस्त्र प्रहरी,नेपाली सेना र स्थानीय उद्धार कार्यमा जुटेका थिए । सडकबाट करिब ३ सय मिटर तल खसेको बस क्षतविक्षत भएको छ । बिहीबार मात्रै डडेल्धुराबाट डोटी जाँदै गरेको बस दुर्घटना हुँदा १६ जनाको मृत्यु भएको थियो । डा. केआई सिंह राजमार्गअन्तर्गत डडेल्धुराको अमरगढी नगरपालिका–११ रडुवा खोलामा से १ क २९३ नम्बरको बस खस्दा १० जनाको घटनास्थलमा र ६ जनाको जिल्ला अस्पताल डडेल्धुरामा मृत्यु भएको हो ।