नवलपुरमा राष्ट्रिय स्तरको प्रथम नेपाल भेट्रान्स कप फुटबल प्रतियोगिता हुने

ज्ञानु पंगेनी
कावासोती  । अग्रेजि नयाँ बर्ष २०२२ एवम् नेपालीहरूको पर्व माघे संक्रान्ति तथा थारु समुदायको माघी पर्वको अवसर पारेर राष्ट्रिय स्तरको प्रथम नेपाल भेट्रान्स कप फुटबल प्रतियोगिता नवलपुरमा हुने भएको छ ।
रिटर्नी माईग्रेन्ट नेपाल नवलपुर शाखाको आयोजना ,टाइगर क्लब गोछडाको सहआयोजना र जिल्ला फुटबल संघ नवलपुरको समन्वयमा यहि पौष १७ गतेबाट प्रतियोगिता सुरु हुने शनिबार कावासोती १४ स्थित नवलपुर चिस्यान केन्द्रमा आयोजना गरिएको पत्रकार सम्मेलनमा जानकारी गराइएको हो । प्रतियोगितामा ४० वर्ष माथिका खेलाडीहरूले मात्रै सहभागिता जनाउन पाउनेछन् । प्रतियोगिता कावासोती १७ को गोछडा स्थित सरस्वती माविको खेल मैदानमा हुने छ ।

पत्रकार सम्मेलनमा टाइगर क्लबका सल्लाहाकार पुष्परत्न महतोले विगतका वर्षहरुमा टाइगर क्लबले आयोजना गर्दै आएको प्रतियोगिता जिल्लाभित्र मात्रै सिमित रहेकोमा यस वर्ष राष्ट्रिय स्तरको प्रतियोगिता आयोजना गर्न पाउँदा खेलकुद क्षेत्रको विकासमा यस प्रतियोगिताले टेवा पु¥याउने बताउनुभयो । उहाँले प्रतियोगिताले नवलपुरको गोछडा क्षेत्र प्रचार प्रसार गर्न तथा पर्यटनमा समेत सहयोग पुग्ने बताउनुभयो । युवा अवस्थामा खेलकुदमा सहभागिता जनाउँदै आएका तर, ४० वर्ष नाघेपछि प्रतियोगितामा सहभागिता जनाउन नपाएका कतिपय खेलाडीहरूलाई भेट्रान्स फुटबल खेलले शारीरिक तथा मानसिक रुपमा तन्दरुस्त गराउन मदत पुग्ने बताउनुभयो ।
पत्रकार सम्मेलनमा प्रतियोगिताको बारेमा जानकारी गराउँदै जिल्ला खेलकुद विकास समिति नवलपुरका सचिव धु्रव खनालले नवलपरासी पूर्व नवलपुर र पश्चिम नवलपरासी सहित काठमाण्डौ , पोखरा , हेटौँडा , चितवन , सुर्खेत वीरगञ्जका गरि १२ वटा टिमले सहभागिता जनाउने बताउनुभयो । उहाँले २४ गते फाईनल खेल हुने जानकारी दिनुभयो । प्रतियोगिता सम्पन्न गर्न करीब ६ लाख रुपिँया खर्च हुने अनुमान गरिएको जानकारी दिनुभयो । यस्तै विभिन्न स्थानीय तह , वैदेशिक रोजगारीमा रहेका नेपाली तथा विभिन्न सामाजिक व्यक्तित्व एवम् सङ्घसंस्थाहरूले आर्थिक सहयोग गरेको बताउनुभयो ।
रिटर्नी माईग्रेन्ट नेपाल गण्डकी प्रदेशका अध्यक्ष नेत्र थनेतले प्रतियोगिताको मुख्य आकर्षणको रुपमा आयोजकको तर्फबाट लोक तथा दोहोरी गायक बद्री पंगेनीले समेत खेल खेल्ने बताउनुभयो । प्रतियोगिताको उद्घाटन प्रतिनिधिसभा सदस्य तिलक महत र समापन गण्डकी प्रदेशका मुख्य मन्त्री कृष्णचन्द्र नेपाली पोख्रेलले गर्ने उहाँले जानकारी दिनुभयो ।

कार्यक्रममा प्रमुख अतिथिका रुपमा बोल्दै जिल्ला खेलकुद विकास समिति नवलपुरका अध्यक्ष तथा जिल्ला फुटबल संघका अध्यक्ष सेतमान पुनले पर्यटकीय सम्भावना बोकेको जिल्ला नवलपुरमा आयोजना हुने फरक किसिमका यस्ता खेलकुद प्रतियोगिताले खेल क्षेत्र र पर्यटन क्षेत्रको विकासमा टेवा पुग्नुका साथै आपसी सहयोग र समन्वयको भावना समेत विकास हुने बताउनुभयो । प्रतियोगिताको सफलताका लागि सबैले साथ र सहयोग गर्न आवश्यक रहेकोमा उहाँले जोड दिनुभयो ।
पत्रकार सम्मेलन रिटर्नी माईग्रेन्ट नेपाल नवलपुरका अध्यक्ष भिम वहादुर महतोको अध्यक्षतामा भएको थियो ।
प्रतियोगितामा विजेता हुने टिमले नगद एक लाख , ट्रफि , मेडल र प्रमाणपत्र प्राप्त गर्नेछ । यस्तै द्धीतीय हुने टिमले नगद ५१ हजार , ट्रफि , मेडल र प्रमाणपत्र प्राप्त गर्नेछ । यस्तै उत्कृष्ट गोलकर्ता , उत्कृष्ट खृलाडीले समेत नगद पाँच हजार र ट्रफि , मेडल र प्रमाणपत्र प्राप्त गर्ने आयोजकले जनाएको छ ।