कावासोतीमा आयो बजाज पल्सर एनएस १२५ सीसी, यस्तो छ मूल्य र बिशेषता

कावासोती । बजाजको पल्सर एनएस १२५ सीसी नवलपुरको कावासोती बजारमा आएको छ । कावासोतीको लागि बजाज बाइकको आधिकारी बिक्रेता चेक इन अटो प्रालीले बिहिबार एक कार्यक्रमका बिच कावासोतीमा पल्सर एनएस १२५ सीसीको सार्वजनिक गरिएको थियो । सार्वजनिक कार्यक्रम उद्योग वाणिज्य संघ नवलपुरका अध्यक्ष बैकुण्ठ प्रसाद अर्यालको प्रमुख आतिथ्यतामा भएको थियो । पल्सर सिरिजको सबैभन्दा कम सीसी क्षमताको यो बाइकको लुक्स तथा डिजाइन यसअघिको एनएस १६० र एनएस २०० बाट प्रेरित छ । यससँगै एनएस सिरिजमा बजाजको संख्या तीन पुगेको छ ।

यो बाइकको मूल्य नेपाली बजारमा २ लाख ७९ हजार ९ सय निर्धारण गरिएको छ । कम सीसी क्षमताको भएपनि यसको लुक्स तथा डिजाइन भने १६० एनएसको जस्तै देखिन्छ । यो बाइकमा टु भल्वयुक्त एयुकुल्ड इन्जिन जडान गरिएको र जसको अधिकतम पावर १२ एचपी र टर्क ११ एनएम रहेको चेक इन अटो प्राली कावासोतीका कार्यकारी निर्देशक राम शर्मा लामिछानेले जानकारी दिए । उनका अनुसार १२५ सीसी इन्जिनमा यति धेरै पावर र टर्क उपलब्ध गराइएका कारण बाइकको पर्फमेन्स उच्च रहने छ ।
अगाडिको चक्कामा डिस्क र पछाडि ड्रम ब्रेक दिइएको यो बाइकको तौल १६० एनएसको तुलनामा ७ किलोग्राम मात्र कम छ । १२ लिटर इन्धन ट्यांकी रहेको बाइकले प्रतिलिटर इन्धन खपतमा ४० किलोमिटर बढी माइलेज दिने कम्पनीको दाबी छ ।