नवलपुरमा अपराध बढ्दो : एक वर्षमा ५५६ मुद्दा, बैंकिङ कसुरदेखि लागुऔषधसम्म बढ्यो

कावासोती । नवलपरासी (बर्दघाट सुस्ता पूर्व)मा आर्थिक वर्ष २०८२/०८३ मा अपराधका घटना र मुद्दा दर्ताको संख्या अघिल्लो आर्थिक वर्षको तुलनामा बढेको छ। जिल्ला प्रहरी कार्यालयको तथ्यांकले जिल्लामा अपराधका विभिन्न स्वरूप बढ्दै गएको देखाएको हो। प्रहरीका अनुसार आर्थिक वर्ष २०८२/०८३ मा जिल्लाभर ५५६ वटा मुद्दा दर्ता भएका छन्। तीमध्ये सबैभन्दा बढी मुद्दा कावासोती नगरपालिकामा २०३ वटा दर्ता भएका छन् भने सबैभन्दा कम बौदीकाली गाउँपालिकामा २ वटा मुद्दा दर्ता भएका छन्।

अपराधका मुद्दा बढेसँगै पक्राउ पर्ने प्रतिवादीको संख्या पनि बढेको छ। प्रहरीका अनुसार यस अवधिमा विभिन्न मुद्दामा ४६१ जना प्रतिवादी पक्राउ परेका छन्।  जिल्लामा दर्ता भएका अपराधका प्रकृतिमध्ये बैंकिङ कसुर, लागुऔषध, जबर्जस्ती करणी, सवारी ज्यान र कर्तव्य ज्यानका मुद्दा अघिल्लो वर्षको तुलनामा बढेका छन्। आर्थिक वर्ष २०८२/०८३ मा बैंकिङ कसुरका ७१ वटा मुद्दा दर्ता भएका छन्। अघिल्लो आर्थिक वर्षमा यस्तो मुद्दा ४३ वटा मात्रै थियो। अर्थात् एक वर्षमै बैंकिङ कसुरका मुद्दा उल्लेख्य रूपमा बढेका छन्।

त्यस्तै, आर्थिक वर्ष २०८२/०८३ मा लागुऔषधका ५२, सवारी ज्यानका ५८ , जबर्जस्ती करणीका २८ र कर्तव्य ज्यानका ११ वटा मुद्दा दर्ता भएका छन्। अघिल्लो आर्थिक वर्षमा यी मुद्दा क्रमशः ३२, २५, १४ र ५ वटा थिए। तथ्यांकले नवलपुरमा परम्परागत अपराधसँगै आर्थिक तथा वित्तीय प्रकृतिका अपराध पनि बढ्दै गएको देखाएको छ। विशेषगरी बैंकिङ कसुरका मुद्दामा भएको वृद्धिले जिल्लामा चेक अनादर, वित्तीय कारोबार तथा अन्य आर्थिक विवादसँग सम्बन्धित अपराधको दबाब बढेको संकेत गरेको छ। अपराध अनुसन्धानसँगै फैसला कार्यान्वयनतर्फ पनि प्रहरीले कारबाही अघि बढाएको छ। आर्थिक वर्ष २०८२/०८३ मा फैसला कार्यान्वयनका क्रममा पक्राउ परेका व्यक्तिहरूबाट ४३ वर्ष २ महिना २० दिन कैद तथा रु. १६ लाख ४२ हजार ९६१ जरिवाना असुलउपर गरिएको जिल्ला प्रहरी कार्यालयको विवरणमा उल्लेख छ। यसले अदालतबाट फैसला भइसकेका मुद्दाको कार्यान्वयनमा समेत प्रहरीले सक्रियता बढाएको देखाउँछ।

अपराध नियन्त्रण र अनुसन्धानसँगै प्रहरीले अवैध गतिविधिबाट हुने राजस्व चुहावट नियन्त्रणमा पनि उल्लेख्य रकम संकलन गरेको छ। आर्थिक वर्ष २०८२/०८३ मा भन्सार छलीतर्फ रु. ३ करोड ३९ लाख १८ हजार ६९१ बराबरको राजस्व संकलन भएको छ। प्रहरीको विवरणअनुसार अघिल्लो आर्थिक वर्षको तुलनामा भन्सार छलीतर्फको राजस्व संकलन १९५.२६ प्रतिशतले बढेको हो। त्यस्तै, अवैध नदीजन्य पदार्थ नियन्त्रणतर्फ रु. ४० लाख ५८ हजार २०० राजस्व संकलन भएको छ। यस शीर्षकमा अघिल्लो आर्थिक वर्षको तुलनामा १२६.४५ प्रतिशतले वृद्धि भएको प्रहरीको तथ्यांकमा उल्लेख छ।

समग्र तथ्यांकले नवलपुरमा एक वर्षको अवधिमा अपराधका मुद्दा मात्र बढेका छैनन्, अपराधका प्रकृतिमा समेत परिवर्तन देखिएको छ। विशेषगरी बैंकिङ कसुर र लागुऔषधजस्ता अपराधको वृद्धि चिन्ताको विषय बनेको छ भने भन्सार छली तथा अवैध नदीजन्य पदार्थ नियन्त्रणबाट ठूलो परिमाणमा राजस्व संकलन भएको देखिन्छ। प्रहरीले सार्वजनिक गरेको विवरणले जिल्लामा अपराध अनुसन्धान, फैसला कार्यान्वयन तथा अवैध गतिविधि नियन्त्रणलाई समानान्तर रूपमा अघि बढाउँदै लगेको देखाए पनि बढ्दो अपराधका कारण र त्यसको दीर्घकालीन नियन्त्रणका उपाय भने थप गम्भीर बहसको विषय बनेको छ।