मध्यविन्दु नगरपालिकाले हक र भोग फरक परेका जग्गाको तथ्यांक संकलन गर्ने

चोरमारा । मध्यविन्दु नगरपालिकाको विभिन्न वडामा जग्गाको हक र भोग फरक हुदा जग्गाको स्वामित्वमा भएको बिबाद निरुपणको लागि नगरपालिकाले सम्बन्धित निकायमा सिफारिस गर्ने भएको छ । जग्गाको स्वामित्वको विषयमा बिबाद देखिएको वडा नं. ४, ५, ६ र १५ मा तथ्यांक संकलन र प्रतिवेदन तयारीको लागि ६ सदस्यीय कार्यदल गठन भएको छ । नगर प्रमुख स्तरीय निर्णयबाट नगर प्रमुख भिमलाल अधिकारीले मध्यविन्दु–२ का वडा अध्यक्ष रामभक्त अधिकारीको संयोजत्वमा सर्वदलिय र बिज्ञ कर्मचारी सम्मेलित कार्यदल गठन गर्नु भएको हो । समितिको सदस्यहरुमा शिव कुमार भण्डारी, जित बहादुर थापा, हरि पाण्डे र बिष्णु अधिकारी रहनु भएको छ । कार्यदलको सदस्य सचिवमा मध्यविन्दु नगरपालिकाका अमिन दिनेशबाबु के.सी. रहनु भएको छ । ३० दिन भित्र प्रतिवेदन पेश गर्नेगरी गठित कार्यदलले तोकिएको शर्तहरुमा रहेर प्रतिवेदन तयार गर्नुपर्ने मध्यविन्दु नगरपालिकाका नगर प्रमुख भिमलाल अधिकारीले बताउनुभयो । कार्यदलको कार्यक्षेत्र दोहोरो स्वामित्वको बिबादित जग्गाको आवश्यक प्रमाण, कागजात संकलन गरी तथ्यांक संकलन र प्रतिवेदन तयार गर्ने कार्यमा मात्र सिमित हुने उहाँले बताउनुभयो । यसरी कार्य गर्दा सम्बन्धित सरोकारवालाहरुसंग कुनै प्रकारको कर, दस्तुर संकलन गर्न पाईने छैन ।

मध्यविन्दु नगरपालिकाको विभिन्न वडा अन्तर्गत गर्ने साबिकका कोल्हुवा, तम्सरिया र प्रसौनी गा.वि.स. मा २०४२ सालमा भएको नापीमा भोक गरेको व्यक्तिको नाममा नभई अन्य व्यक्तिहरुको स्वामित्वमा हक कायम गरिएको गुनासो र निवेदनहरु नगरपालिकामा प्राप्त भएपछि नगर कार्यपालिकाको २०७९ पुस ३ गतेको निर्णय बमोजिम कार्यदल गठन गरिएको अधिकारीले बताउनुभयो । उहाँले कार्यदलले तयार गरेको प्रतिवेदन नगरपालिकाले आवश्यक र औचित्यको आधारमा सम्बन्धित निकायहरुमा पेश गर्ने बताउनुभयो । लामो समय सम्म विवाद रहदा त्यसको समाधानमा झन् कठिनाई हुन सक्ने कुरालाई ध्यानमा राखेर कार्यदल गठन गरिएको उहाँले बताउनुभयो । मध्यविन्दु नगरपालिकाको विभिन्न क्षेत्रमा स्थायी रुपमा बसोबास गरेका व्यक्तिहरुको नाममा हुनुपर्ने जग्गाहरु अन्य व्यक्तिहरुको नाममा दर्ता कायम रहेको छ । स्थानीयले नापी हुनुपूर्व नै जोतभोग गर्दै आएको जमिनमा जिल्ला भन्दा बाहिरका व्यक्तिहरुको नाममा जग्गा धनि पुर्जा बनाई बास्तविक जग्गावालाहरुलाई बञ्चीत गरिएको स्थानीयहरुको भनाई छ ।