बैशाख १ देखि चितवनमा पनि प्याराग्लाइडिङ

कम्पनीले प्याराग्लाइडिङका लागि १.८५ नटिकल माइल वरपर उडान गर्ने अनुमति पाएको कम्पनीका अध्यक्ष घलेले बताए । ‘सिधै माथि ५ हजार मिटरसम्म जान पाइनेछ । फटाफट उडेर त्रिशूलीमा झर्दा चौकीडाँडाबाट २० मिनेट लाग्नेछ,’ उनले भने । तत्काललाई १० वटा पाइलट राखेर उडान गरिने उनले जानकारी दिए । त्यसका लागि आवश्यक भौतिक पूर्वाधारको काम भैरहेको छ ।प्याराग्लाइडिङ उडेर तनहुँको देवघाट गाउँपालिका–५ मा रहेको त्रिशूली नदीको किनारमा अवतरण गराउने योजना छ । त्यहाँ २० रोपनी जग्गा २० वर्षका लागि भाडामा लिइएको छ । अवतरण हुने ठाउँमा त्रिशूली नदीमा वाटर एक्टिभिटिज गराउने, र्‍याफ्टिङ्ग, डेजर्ट सफारी जस्ता क्रियाकलाप गर्ने योजना कम्पनीले बनाएको बोर्ड डाइरेक्टर शालिक दवाडीले जानकारी दिए ।

पोखरामा अन्तर्राष्ट्रिय विमानस्थल बनेपछि झण्डै–झण्डै विस्थापित हुने अवस्थामा पुगेको प्याराग्लाइडिङलाई चितवन स्थापित गराउने योजना अनुरूप काम गरिएको अध्यक्ष घलेले बताए । परीक्षणका क्रममा प्याराग्लाइडिङबाट त्रिशूली नदी र वरपरको भ्यू पोखराको भन्दा राम्रो देखिएको उनको भनाइ छ । ‘यहाँबाट पनि उचाइ लिँदा हिमाल देखिन्छ, फेवातालको जस्तो झल्को दिने त्रिशूली नदी छ, नदी किनारको बालुवा, हरियाली, मुग्लिन–नारायणगढ सडकखण्ड आकर्षक देखिन्छ’ अध्यक्ष घलेले भने, ‘चितवनमा अर्को एक राम्रो पर्यटकीय प्याकेज थपियो भन्ने लाग्छ, यसले जिल्लाको समग्र पर्यटकीय क्रियाकलापमा अलग्गै पहिचान हुनेछ ।’ पर्यटकहरुको चितवन बसाइँलाई लम्बाउन यसले टेवा दिने विश्वास लिइएको अध्यक्ष घलेले बताए ।