नवलपुरमा सकियो ट्राफिक सप्ताह, ४९ हजार भन्दा बढीलाई शिक्षा

कावासोती । देशकै लाइफलाइन ‘पूर्व पश्चिम राजमार्ग’मा सवारीको चाप त हुने नै भइहाल्यो । यहाँ दैनिक गुड्ने हेभी सवारीको संख्या अन्य राजमार्गको हराहारी भन्दा बढी हुन्छ । सवारीको चापसँगै दुर्घटनाहरु निम्तिरहेका देखिन्छन् । विशेषत : दाउन्ने यता गैंडाकोटसम्मको क्षेत्रलाई सवारी दुर्घटनाको ‘रेड जोन’ मान्न सकिन्छ । यो खण्डले दैनिकजसो दुर्घटना ब्यहोरीरहन्छ । कारण फरक फरक हुन सक्छन् तर दुर्घटनाले परिवार उजाडिएको छ । हाइवे पट्रोलिङ, सवारी कागजपत्र/मापसे चेकजाँच, चेतना मुलक कार्यक्रम भइरहेकै छन् । तर दुर्घटनामा उल्लेखनीय कमी आउन नसकेको तितो तथ्यांक पनि यथावत् छ । सडक सुरक्षाकै खातिर नवलपुरको ट्राफिक प्रहरीले गत बैशाख २५ देखि ३० गतेसम्म ट्राफिक सप्ताह -२०८० नाम दिएर सप्ताहव्यापी अभियान ग¥यो । यो अभियानमा ४९ हजार ७ सय ३६ जनालाई ट्राफिक नियम र सडक सुरक्षाको बिषयमा जानकारी गराएको नवलपुर ट्राफिक प्रहरीको दाबि छ । नवलपुरमा ट्राफिक सप्ताह कार्यक्रमबाट प्रत्यक्ष र अप्रत्यक्षरुपमा ट्राफिक नियम र सडक सुरक्षाको बिषयमा आम नागरिकलाई शिक्षा दिएको नवलपुरका ट्राफिक प्रमुख प्रहरी निरिक्षक गणेश पौडेलले बताए । पौडेलको अनुसार यो अभियानबाट नवलपुरमा ६५ वटा सवारीको अवस्था परीक्षण गरिएको छ भने ३ सय १५ जना सवारी चालकको स्वास्थ्य परीक्षण समेत भएको छ । यो अभियान नवलपुरको ८ वटै पालिकामा भएको थियो ।