नवलपुरमा वन कर्मचारीको मनोमानि कार्यालयमै बन्छ फर्निचार सामाग्री

चोरमारा । पूर्वी नवलपरासीको सव डिभिजन वन कार्यालय, भाग्रा–रानिटारका कार्यालय प्रमुखले अवैध रुपमा कार्यालयमा नै फर्निचार सामाग्री निर्माण गरेको भेटिएको छ । कार्यालयमा निर्माण गरिरहेको अवस्थामा भेटिएको पलङमा सिसौ र सालको काठ प्रयोग गरिएको छ । उक्त काठ अवैध रुपमा प्रयोग गरिएको स्थानीय उपभोक्ताहरुको आरोप छ । मध्यविन्दु नगरपालिका–७ चोरमारामा कार्यालय उक्त सव डिभिजन वन कार्यालयमा स्थानीयहरु बिहिबार बिहान अन्य विषयमा डेलिकेशनको लागि पुगेका थिए । सिसौं र सालको काठ प्रयोग गरेर कार्यालयमा नै पलङ बन्दै गरेको देखेपछि स्थानीय बासिन्दाहरुले कार्यालय प्रमुख दुर्गादत्त कण्डेललाई जिज्ञासा राखेका थिए । जवाफमा कार्यालय प्रयोजनको पलङ भएको जवाफ दिएका कण्डेलले स्थानीयले सो सम्बन्धी बिल भरपाई र जिन्सी दाखिलाको प्रश्न राखेपछि अलमल परेका थिए ।

कार्यालय प्रयोजनको लागि पलङ बन्दै गरेको कार्यालय प्रमुख कण्डेलले दावी गरेपनि कार्यालयका सागरचन्द्र ढुंगनाले उक्त पलङ व्यक्तिगत लगानीमा निर्माण भएको र सो सम्बन्धी आफुलाई जानकारी नभएको जवाफ दिएपछि स्थानीयहरु थप आक्रोशित भएका थिए ।

वनका कर्मचारीले कार्यालयमा नै बसेर फर्निचर सामाग्री निर्माण गर्दै अवैध विक्रि गरेको हुन सक्ने भन्दै आवश्यक छानविन गर्न स्थानीय श्याम ढकालले माग गर्नुभयो । दुई जना कर्मचारीको फरक फरक जवाफ र कार्यालयमा फर्निचर सामाग्री निर्माण भएको हुदा उक्त सामाग्री अवैध भएको उनिहरुको दावी छ । कार्यालयमा पलङ निर्माणको विषयमा आफुलाई गुनासो प्राप्त भएको डिभिजन वन कार्यालय नवलपुरका प्रमुख डिएफओ मेघराज पौडेलले बताए । उक्त विषयमा छानविन समिति गठन गरेर अनुसन्धान गर्ने तयारीमा आफु रहेको उनले बताए । अनुसन्धानमा दोषि भेटिए कारवाही हुने उनले बताए ।