२०८३ श्रावण ११, सोमबार

स्थानीय तहका कर्मचारीको आन्दोलनमा प्रहरी दमनप्रति निजामती ट्रेड युनियनहरूको विरोध

नमुना पोष्टप्रकाशित मिति: २०८० आश्विन २३, मंगलबार (२ साल अघि)

काठमाडौं । स्थानीय तहमा कार्यरत कर्मचारीहरूको आन्दोलनमा प्रहरी दमन भएको भन्दै निजामती क्षेत्रका राष्ट्रिय ट्रेड युनियनहरूले गम्भीर ध्यानाकर्षण भएको जनाएका छन् ।काठमाडौं केन्द्रित शान्तिपूर्ण आन्दोलन जारी रहे पनि कर्मचारीहरूमाथि प्रहरी हस्तक्षेप गरी निर्ममतापूर्वक लखेटी लखेटी कुटपिट गरिएको घटनाले दुःखी बनाएको युनियनहरूले विज्ञप्ति मार्फत जनाएका छन् ।विभिन्न ५ वटा युनियनहरूले घटनाको निन्दा र भर्त्सना गर्दै घाइते कर्मचारीहरूको निःशुल्क उपचारको व्यवस्था गर्न सरकारसँग माग गरेका छन् ।

संघीय संसदमा पेश गर्ने भनिएको विधेयक सरोकारवालासँग पर्याप्त छलफल सुझाव संकलन गर्दै आएकोमा त्यसो नभएको भन्दै विरोध भइरहेको छ ।समयमै ऐन जारी नहुँदा विभिन्न क्षेत्रमा गम्भीर असर र प्रभाव पर्न थालेकोतर्फ पनि युनियनहरूले ध्यानाकर्षण गराएका छन् ।समस्याको समाधान आन्दोलनमाथि दमन नभएर वैधानिक बाटोबाट खोज्नुपर्ने उनीहरूको माग छ ।विज्ञप्तिमा नेपाल निजामती कर्मचारी संगठनका अध्यक्ष लेखनाथ कोइराला, नेपाल निजामती कर्मचारी युनियनका गोपाल प्रसाद पोखरेलले हस्ताक्ष्ँ गरेका छन् ।

यस्तै नेपाल राष्ट्रिय कर्मचारी संगठनका अम्बादत्त भट्ट, एकीकृत सरकारी कर्मचारी संगठन नेपालका गगनसिंह विष्ट र नेपाल मधेशी निजामती कर्मचारी मञ्चका उपाध्यक्ष विजयकुमार सिंहले हस्ताक्षर गरेका छन् ।