ट्रकमा लुकाएर ल्याइयो ६२ लाख ५० हजारको कपडा, नवलपुरमा समातियो

कावासोती । पूर्व–पश्चिम राजमार्ग हुँदै भन्सार छलीका सामान ओसारपसार भइरहेको अवस्थामा नवलपुर प्रहरीले ठूलो परिमाणमा कपडा बरामद गरेको छ। नियमित चेकजाँचका क्रममा प्रहरीले ६२ लाख ५० हजार ५ सय रुपैयाँ मूल्य बराबरका कपडा बरामद गरेपछि राजमार्गमार्फत भइरहेको अवैध सामान ओसारपसारको ठूलो कारोबार बाहिर आएको छ।

भन्सार छली गरी बिल–बिजकबिनै सामान ओसारपसार भइरहेको गोप्य सूचना पाएपछि जिल्ला प्रहरी कार्यालय नवलपरासी (बर्दघाट सुस्ता पूर्व)बाट प्रहरी टोली परिचालन गरिएको थियो। प्रहरी टोलीले राति साढे १२ बजे कावासोती नगरपालिका–८ स्थित फलफूल चोकमा पश्चिमबाट पूर्व नारायणगढतर्फ जाँदै गरेको ना ३ ख ४६७३ नम्बरको ट्रक रोकेर चेकजाँच गरेको थियो।

बाहिरबाट सामान्य रूपमा सामान बोकेर हिँडेको देखिने उक्त ट्रकभित्र प्रहरीले खानतलासी गर्दा ठूलो परिमाणमा विभिन्न प्रकारका कपडा लुकाइछिपाइ राखिएको अवस्थामा फेला पारेको हो। प्रहरीले बरामद गरेको सामानमा विभिन्न रंगका कुर्ता–सुरुवाल, साडी तथा काँचो कपडा रहेका छन्।

प्रहरीको विवरण अनुसार ट्रकबाट विभिन्न रंगका कुर्ता–सुरुवाल २ हजार १ सय ६० थान, साडी १ हजार ५ सय थान, काँचो कपडा २२५ थान (६ हजार ८७५ मिटर) र अर्को प्रकारको काँचो कपडा ३१५ थान (७ हजार ६८७ मिटर) बरामद भएको छ।

बरामद सबै सामानको मूल्य ६२ लाख ५० हजार ५ सय रुपैयाँ कायम गरिएको प्रहरीले जनाएको छ। ठूलो परिमाणमा सामान फेला परेपछि प्रहरीले सामानसहित ट्रक र चालकलाई नियन्त्रणमा लिएर थप अनुसन्धान तथा कानुनी कारबाहीका लागि महेशपुर भन्सार कार्यालय, नवलपरासी (बर्दघाट सुस्ता पश्चिम) पठाएको छ।

बिल–बिजकसमेत नभएको अवस्थामा यति ठूलो परिमाणमा कपडा फेला पर्नुले सामान भन्सार प्रक्रिया पूरा नगरी ल्याइएको आशंका थप बलियो बनाएको छ। प्रहरीले सामानको स्रोत, गन्तव्य तथा यसको ओसारपसारमा संलग्न व्यक्तिहरूबारे समेत थप अनुसन्धान गर्ने जनाएको छ।

पूर्व–पश्चिम राजमार्ग नवलपुर खण्डमा प्रहरीले पछिल्लो समय भन्सार छली, अवैध सामान ओसारपसार तथा शंकास्पद गतिविधिमाथि निगरानी बढाउँदै आएको छ। सोही क्रममा एकैपटक ६२ लाखभन्दा बढी मूल्यको कपडा बरामद हुनु ठूलो सफलता भएको प्रहरीको दाबी छ।

विशेषगरी रातको समयमा राजमार्ग हुँदै बिल–बिजकबिनै सामान ओसारपसार गर्ने प्रयास भइरहेको अवस्थामा प्रहरीले चेकजाँच कडा बनाएपछि ठूलो परिमाणको सामान नियन्त्रणमा आएको हो। यस घटनाले राजमार्गलाई प्रयोग गरेर भन्सार छलीका सामान ओसारपसार गर्ने गिरोह सक्रिय रहेको हुनसक्ने संकेतसमेत गरेको छ।