डेंगु संक्रमणदर बढ्दो

पोखरा । गण्डकी प्रदेशको तनहुँ र कास्कीमा डेंगु संक्रमणदर बढ्न थालेको छ । प्रदेशका ११ जिल्लाहरू मध्य हालसम्म तनहुँ र कास्कीमा डेंगु संक्रमणदर बढेको गण्डकी प्रदेशका सामाजिक बिकास तथा स्वास्थ्य मन्त्रालयका सूचना अधिकारी मधुरजी ढकालले बताउनु भयो । उहाँका अनुसार हालसम्म गण्डकी प्रदेशको तनहुँमा ४ हजार ६ सय ५१ जनामा डेंगु संक्रमण देखा परेको छ । त्यसै गरी तनहुँ पछि कास्कीमा हालसम्म १ हजार ४ सय ८१ जनामा डेंगु संक्रमण देखा परेको सूचना अधिकारी ढकालले उल्लेख गर्नु भयो । हिमाल पारीको जिल्ला मुस्ताङमा हालसम्म डेंगु संक्रमण देखा परेको तथ्याङ्क मन्त्रालयसँग छैन भने मनाङमा ६ जनामा डेंगु संक्रमण देखा परेको तथ्याङ्क सार्वजनिक गरेको छ । त्यसै गरी सबै भन्दा थोरै पर्वतमा ४ जनामा डेंगु संक्रमण देखा परेको सूचना अधिकारी ढकालले जनाउनु भयो ।

त्यसै गरी गोर्खामा यस बर्ष १ सय ७४ जनामा, लमजुङमा १ सय ४०, नवलपुरमा १ सय १०, स्याङ्जामा ५६, म्याग्दीमा ९२, बागलुङमा ६४ जनामा डेंगु संक्रमण देखा परेको उहाँले जनाउनु भयो । गण्डकी प्रदेशका यस बर्ष हालसम्म डेंगु सङ्क्रमणबाट ५ जनाको मृत्यु भएको सूचना अधिकारी ढकालले बताउनु भयो । प्रदेशमा हालसम्म ६ हजार ७ सय ७८ जनामा डेंगु संक्रमण देखा परेको उहाँले जनाउनु भयो । अझै पनि पानी परि रहेकोले गर्दा डेंगु सङ्क्रमणको जोखिम अझै कायमै रहेकोले पूर्व सावधानी अपनाउने र संक्रमण भएमा चिकित्सकको सल्लाहमा मात्र औषधि लिन सूचना अधिकारी ढकालले जनाउनु भयो ।

यसैबिच, स्वास्थ्य कार्यालय कास्कीका प्रमुख बद्री आचार्यले कास्कीमा डेंगु संक्रमण दर बढ्दो रुपमा रहेकोले सचेतना आवश्यक भएको बताउनु भयो । कास्कीमा एक हजार भन्दा बढी डेंगु सङ्क्रमणका बिरामी भेटिनु भनेको जोखिम भएको उहाँको भनाई छ । गण्डकी प्रदेशकै सबै भन्दा ठुलो सामुदायिक अस्पताल पोखरा स्वास्थ्य विज्ञान प्रतिष्ठानमा पनि हिजोआज डेंगु सङ्क्रमणका बिरामीहरू आउने क्रम जारी रहेको अस्पतालका निर्देशक डा. भरतबहादुर खत्रीले बताउनु भयो । उक्त अस्पतालमा हाल २ जना सघन उपचार कक्ष (आईसियू) मा सहित गरी ११ जना डेंगु सङ्क्रमणका बिरामीको भर्ना गरी उपचार हुँदै गरेको अस्पतालका वरिष्ठ मेडिकल रेकर्डर अधिकृत भिम प्रसाद पौडेलले बताउनु भयो । स्वास्थ्य कार्यालय पर्वतका कार्यालय प्रमुख एकनारायण लम्सालले केही समय अघि २ जनामा डेंगु संक्रमण देखा परेको बताउनु भयो । अहिले पनि सतर्कता नअपनाए डेंगु संक्रमण बढ्न सक्ने मन्त्रालयका सचिव डा.विनोद विन्दु शर्माले बताउनु भयो । चिकित्सकका अनुसार हल्कादेखि उच्च ज्वरो आउने, मांसपेशीहरू अत्यधिक दुख्ने, टाउको दुख्ने, आँखा वा आँखाका गेडी दुख्ने, वान्ता हुने थकान र बेचैनी हुने एवं जोर्नीहरू दुख्ने यस रोगको लक्षण भएको उहाँले बताउनु भयो ।