२०८३ श्रावण ३१, आईतबार

जारको पानी खाएर बिरामी परेको भन्दै उजुरी

नमुना पोष्टप्रकाशित मिति: २०८० कार्तिक १४, मंगलबार (२ साल अघि)

जनकपुरधाम । जनकपुरधाम उपमहानगरपालिका-९ मा जारको पानी खाएपछि बिरामी परेको भन्दै एक युवकले कारबाहीको माग गरेका छन् ।जनकनन्दनी गाउँपालिका-९ इनर्वा घर भई जनकपुरमा बस्दै आएका विद्यार्थी इन्द्रजीत गोइतले आफू ३ दिनदेखि बिरामी परेको बताए । रेल्वे स्टेशननजिकै एक किराना पसलबाट किनेको पानीमा मटीतेल मिसिएको उनको भनाइ छ ।‘आइतबार राति जार किनेर डेरा लगेर पानी खाएर सुत्न लाग्दा अचानक टाउको र पेट दुख्न थाल्यो । सहन नसकेपछि रातिमै औषधि पसलमा गए । त्यहाँ समस्या भनेपछि दिएको औषधी खाए । त्यसपछि हल्का आराम भयो । बिहान जार चेक गर्दा मटीतेलजस्तो गन्ध आयो । जार समेत फोहोर रहेछ’, उनले भने ।

किराना पसल पुगेपछि ‘प्रिया जल कम्पनी’ को पानी रहेको थाहा भएको गोइतले सुनाए । स्रोतका अनुसार उक्त कम्पनी कुनै सरकारी निकायमा दर्ता छैन ।

इन्द्रजीतले जिल्ला प्रशासन कार्यालय धनुषामा उजुरी दिएका छन् । छानबिन तथा कारबाहीका प्रशासनले खाद्य प्रविधि तथा गुण नियन्त्रण कार्यालयलाई पत्र काटेको छ । पानी किन्दा अस्वाभाविक गन्ध आएको भन्दै उनले खाद्य प्रविधि तथा गुण नियन्त्रण कार्यालयसमक्ष छानबिन गरी कारबाही गर्न आग्रह गरेका छन् । कम्पनीले जारमा पानी प्याकिङ गर्दा नै लापरबाही गरेको देखिएकाले कारबाही हुनुपर्ने उनको माग छ ।कम्पनीका मालिकसँग फोनमा कुरा गर्दा नाम बताउन चाहेनन् । उनले मटीतेल बेच्ने पसलबाट जार किनेकाले मिसिएको हुनसक्ने जवाफ दिए ।उनले भने, ‘पानी खाएरै बिरामी परेको भन्दै एकजनाले प्रशासनले उजुरी दिएको मैले पनि जानकारी पाएँ । उहाँसँग कुरा भयो । उजुरी फिर्ता लिनुहुन्छ ।’गोइतले भने आफूलाई मालिकहरू भेट्न आएर उजुरी फिर्ता लिन भनेपनि कारबाहीको अडान कायमै रहेको बताएका छन् ।