कावासोती नगरपालिकामा हरित ऊर्जा अभियानको नयाँ सुरुवात

कावासोती । हरित नगर निर्माण र दिगो विकासतर्फ उन्मुख कावासोती नगरपालिकाले प्रदूषणरहित भान्सा र धुवाँमुक्त नगरको सपना साकार पार्न थप एक ठोस कदम चालेको छ । नगरपालिकाले नगरवासीको स्वास्थ्य, वातावरणीय सुधार र ऊर्जा संरक्षणलाई प्राथमिकता दिँदै तह ३ स्तरका सुधारिएको चुलो वितरण कार्यक्रम सुरु गरेको हो ।

बुधबार कावासोती वडा नं. १५ र ४ मा ५० वटा सुधारिएको चुलो वितरण गरिएको छ। यो कार्यक्रम ३०० चुलो वितरण योजनाको पहिलो चरण हो भने बाँकी चुलोहरु पनि चालु आर्थिक वर्ष २०८२÷८३ भित्रै वितरण गरिने जनाइएको छ । बुधबार कावासोती वडा नं. १५ मा एक विशेष समारोहमा बोल्दै नगर प्रमुख विष्णुप्रसाद भुसालले सुधारिएको चुलो वितरण अभियानलाई नगरको सामाजिक र वातावरणीय रुपान्तरणको आधार स्तम्भ रहेको बताउनुभयो । उहाँले भन्नुभयो, “हामी केवल चुलो वितरण गरिरहेका छैनौँ, हामी स्वच्छ ऊर्जा, स्वास्थ्य र समयको रक्षा गर्दैछौं । हामी कावासोतीलाई धुवाँरहित, हरित र जीवनमैत्री नगर बनाउने दिगो यात्रामा अगाडि बढिरहेका छौँ।” उहाँका अनुसार नगरपालिकाको ऊर्जा सम्बन्धी दीर्घकालीन रणनीति अन्तर्गत २०८२÷८३ सालभित्र २००० वटा विद्युतीय चुलो र ५ वटा घरायसी बायोग्यास प्लान्ट वितरण गर्ने योजना समेत अघि सारिएको छ । यसले खाना पकाउने परम्परागत, प्रदूषणयुक्त विधिबाट आधुनिक, सुरक्षित र वातावरणमैत्री प्रविधितर्फको संक्रमणलाई तीव्र बनाउनेछ ।

वितरण कार्यक्रममा नगरपालिकाका आर्किटेक्ट इन्जिनियर पवन रूपाखेतीले चुलोको प्रविधि र फाइदाबारे प्राविधिक पक्ष राख्दै भन्नुभयो, “तह ३ स्तरको सुधारिएको चुलो वातावरणमैत्री प्रविधिमा आधारित छ । यसले परम्परागत चुलोको तुलनामा ५० प्रतिशतसम्म इन्धनको बचत गर्छ । यो चुलोले धुवाँ कम निकाल्ने भएकाले महिलाहरुको स्वास्थ्यमा सकारात्मक असर पर्छ ।” नगरपालिकामा चुलो वितरण हरित जलवायु कोष, वैकल्पिक ऊर्जा प्रवद्र्धन केन्द्र,कावासोती नगरपालिका र उपभोक्ताबीचको लागत सहभागिता सुनिश्चित गरिएको छ । यसले सरकारी कार्यक्रमप्रतिको स्थानीय स्वामित्व र सहभागिता सुनिश्चित गरेको वडा नं. १५ का वडा सदस्य मिना कुमारी मुसहरले बताउनुभयो ।