कांग्रेस नवलपुरले गठबन्धनमा अन्य दललाई पालिका प्रमुख/अध्यक्ष नदिने

कावासोती । आउँदो बैशाख ३० गते हुने स्थानिय तहको निर्वाचनमा नेपाली कांग्रेस नवलपुरले गठबन्धनमा अन्य राजनैतिक दललाई पालिका प्रमुख र अध्यक्ष पद नदिने भएको छ । नेपाली कांग्रेस नवलपुरका जिल्ला सचिव होमराज रानाभाटका अनुसार नवलपुरमा रहेको ४ नगरपालिकाको प्रमुख र ४ गाउँपालिकाको अध्यक्ष पद अन्य गठबन्धनका दललाई नदिने बताएका छन् ।

नमुना सन्देश साप्ताहिक सँग कुरा गर्दै रानाभाटले भने – “पालिकाको प्रमुख र अध्यक्ष पद नेपाली कांग्रेस नवलपुरले अन्य दललाई दिदैन । पालिकाको उप–प्रमुख , उपाध्यक्ष ,वडा अध्यक्ष र वडा सदस्य पदमा भने हामी गठबन्धन गर्छाै । ” रानाभाटका अनुसार कांग्रेस केन्द्रीय कार्यालयको निर्देशन बमोजिम जिल्लामा गठबन्धन गर्न लागेको बताएका छन् । उनको अनुसार नवलपुरमा नेपाली कांग्रेस , नेकपा माओवादी , नेकपा (एकीकृत समाजवादी) , राष्ट्रिय जनमोर्चा र जनता समाजवादी दल बिच आउँदो बैशाख ३० गते हुने स्थानिय तहको निर्वाचनमा गठबन्धन गर्ने तयारी गरेको जानकारी दिए । अहिले गठबन्धको बिषयमा वडा तह र पालिका तहमा छलफल भएको र अबको केही दिनमा जिल्ला तहमा गठबन्धनको बिषयमा छलफल हुने रानाभाटले बताएका छन् । साथै नेपाली कांग्रेस केन्द्रीय समितिले तत्काल उमेद्वार नतोक्न निर्देशन दिएको छ । सबै जिल्लालाई उमेद्वारको नाम तत्काल सिफारीस नगर्न केन्द्रीय समितिले रोक लगाएको कांग्रेस नवलपुरका सचिव रानाभाटले बताए ।