पालिका अध्यक्ष गिरीले भने : बिरामी परेका विद्यार्थीको घटना अनुसन्धान हुन्छ

कावासोती । पूर्वि नवलपरासीको सर्दीमा फुड प्वाइजनले बिरामी परेका विद्यार्थीहरुलाई विनयीत्रिवेणी गाउँपालिकाको अध्यक्ष घनश्याम गिरीले शनिबार अस्पताल पुगेर भेटेका छन् । उनले अस्पताल पुगेर बिरामी विद्यार्थीहरुको अवस्था बुझेका हुन् । उनले घटनाको बिषयमा तत्काल अनुसन्धान हुने समेत बताएका छन् ।
गत बिहिबार विनयीत्रिवेणी ४ सर्दीमा रहेको रिचार्ज इङ्गलिस बोर्डिङ्ग स्कूलमा अध्ययनरत ३१ जना विद्यार्थी फुड प्वाइजनका कारण बिरामी परेका थिए । उनिहरुको मध्यविन्दु जिल्ला अस्पताल डण्डामा उपचार भइरहेको छ । विद्यालय भित्रै रहेको खाजा घर क्यान्टिनमा चाउमिन खाजा खाएका करिब २ सय जना विद्यार्थी मध्ये १९ जना छात्र र १२ जना छात्रा गरी ३१ जना विद्यार्थी विरामी परेका थिए ।

खाजा खाए लगतै वान्ता गरेपछि उनीहरुलाई उपचारका लागि अस्पताल ल्याइएको थियो । पालिका अध्यक्ष गिरीका अनुसार विद्यार्थीहरुको अवस्था खतरामुक्त रहेको र यस्तो संवेदनसिल घटनाको तत्काल अनुसन्धान गर्न उनले प्रहरी प्रशासन सँग माग समेत गरेका छन् ।