आजबाट नवलपुरको डण्डामा साँस्कृतिक महोत्सव ,किरण गुरूङले उद्घाटन गर्ने

कावासोती । नवलपुरको डण्डामा आजबाट शुरु हुने खिचरी साँस्कृतिक महोत्सवको तयारी पूरा भएको छ । पहिलो पटक हुन लागेको माघी (खिचरी) सांस्कृतिक महोत्सवको गण्डकी प्रदेशका आर्थिक मामिला तथा योजना मन्त्री किरण गुरूङले उद्घाटन गर्ने कार्यक्रम तय भएको आयोजकले जनाएको छ । थारूहरूले हर्षोल्लासका साथ खिचरी अथार्त माघी महोत्सव मनाउन लागेको थारू कल्याणकारी सभाका अध्यक्ष रामप्रसाद महत्तोले जानकारी दिए । आज देखि माघ ६ गतेसम्म दश दिन चल्ने माघी महोत्सवले यस भेगका थारूहरूको खानाको परिकार, पहिचान र संस्कृति झल्कने एवं संङग्राहालयको माध्यमबाट पर्यटन विकासमा टेवापुग्ने लक्ष्य लिईएको छ ।
देशकै मध्यभागमा रहेको कावासोती नगरपालिका–१६, सहिद नगर डण्डा बजारको थारू संङग्राहालय परिसर भीत्र महोत्सवको आयोजना गरिएको छ । खिचरीका अतिरिक्त १ सय पचास ब्यबसायीक स्टल राखिने हुंदा २ लाख बढी दर्शकले महोत्सवको अवलोकन गर्ने आयोजक थारू कल्याणकारी सभा नवलपुरले जानकारी गराएको छ । महोत्सवमा थारूजातीको गौरव प्रथम राष्ट्रिय माघी डान्स आईडल समेत अनयोजना गरिएको सञ्चार संयोजक नेत्र थनैतले बताए । गण्डकी प्रदेशको कृषि पकेट क्षेत्रको रूपमा नवलपुरको परिचय दिन धर्तिपुत्र थारूहरू लागिपरेको उनले उल्लेख गरे । माघी महोत्सवमा थारू र अन्य राष्ट्रिय कलाकारहरूको जोडदार प्रस्तुति रहने तथा खेलकुद र सामाजिक सेवाका कार्यहरू समेत संचालन गरिने आयोजकले जानकारी दिएको छ ।