विनयीत्रिवेणीमा सवस्टेशन निर्माण प्रक्रिया सुरु   

तिर्थराज डुम्रे,चोरमारा । नवलपरासी पूर्व नवलपुरको विनयी त्रिवेणी गाउँपालिकामा सब–स्टेशन निर्माणको पक्रिया शुरु भएको छ । विनयी त्रिवेणी गाउँपालिका २ मा निर्माण गरिने अरुणखोला दुम्किबास १३२ के भि सब स्टेशन आयोजनाको लागि जग्गा अधिग्रहणको काम सम्पन्न भएको आयोजना प्रमुख रञ्जननाथ गुरुङले बताउनुभयो । सब–स्टेशन निर्माणको लागि आवश्यक चार विगाह जमिनको मुअब्जा वितरणको काम सकिएको उहाँले बताउनुभयो । एसियाली बिकास बैंकको ७ मिलियन अमेरिकी डलर सहयोगमा दुई वर्ष भित्र निर्माण सम्पन्न हुने आयोजना निर्माणको लागि ठेक्केदार कम्पनी छनोट गरी सम्झौताको काम अगाडी बढेको आयोजना प्रमुख गुरुङले बताउनुभयो । हाल बर्दघाटबाट ह्वाङ्सी सिमेन्ट उद्योग सम्म आएको १३२ के.भि. प्रशारण लाईनमा डबल सर्किटको सब–स्टेशन निर्माण गरिनेछ । सब–स्टेशन निर्माण पछि मध्यविन्दु नगरपालिका र विनयी त्रिवेणी गाउँपालिकाका उपभोक्ताहरुले भोग्नु परेको भोल्टेज सम्बन्धि समस्या समाधान हुनेछ ।

हाल मध्यविन्दु नगरपालिकाको गिरुवारी खोला पूर्व क्षेत्रमा प्रगतिनगर सब–स्टेशन र पश्चिम तर्फ बर्दघाट सब–स्टेशन मार्फत विद्युतिकरण हुदै आएको छ । अब सब–स्टेशन निर्माण पछि गिरुवारी खोला पश्चिम मध्यविन्दु नगरपालिका र विनयी त्रिवेणी गाउँपालिकामा सोही स्टेशनबाट विद्युतिकरण हुनेछ । हाल यस क्षेत्रका स्थानीय कम भोल्टेज समय समयमा विद्युत प्रशारण अवरुद्ध हुने जस्ता समस्याहरु भोग्दै आएका छन् ।सब–स्टेशन निर्माणले स्थानीय उपभोक्ताले भोग्नु परेको समस्या सामाधान संगै स्थानीय स्तरमा लगानीको वातावरण समेत तयार हुने विनयी त्रिवेणी गाउँपालिकाका अध्यक्ष घनश्याम गिरीले विश्वास व्यक्त गर्नुभयो । हाल विनयी त्रिवेणी गाउँपालिका क्षेत्रमा उद्योग तथा व्यवसाय स्थापनाका लागि आउने व्यवसायिहरुको संख्या उल्लेखनिय रहेको भन्दै उहाँले सब–स्टेशन निर्माण पछि थप व्यवसायिहरु व्यवसाय सञ्चालनको लागि गाउँपालिका आउने उहाँले विश्वास व्यक्त गर्नुहुन्छ । “विनयी त्रिवेणी गाउँपालिका भित्र सञ्चालित देश कै ठुलो सिमेन्ट उद्योग सहित यहाँ सञ्चालित अन्य उद्योगहरु त यसैपनि लाभाम्वीत हुनुहुन्छ । ” गिरीले भन्नुभयो – “ नयाँ व्यवसाय गर्न चहाने व्यवसायिहरुलाई पनि आवश्यक पूर्वाधारको उपलब्धता भएपनि लगानी मैत्री वातावरण अवश्य बन्छ ।”