मेलामा जुधाउन ल्याएको लाले बिच्किएपछि (फोटो कथा)

शब्द/तस्बिर : दिपेन श्रेष्ठ

माघे संक्रान्तिको दिन नुवाकोटको तारकेश्वर गाउँपालिका–२ तारुकामा सदाझै यस पनि गोरु जुधाउने मेलाको रौनक थियो । करिब ६ महिनादेखि यही मेलामा जुधाउनका लागि तयार गरेको लाले नामक आफ्नो गोरु लिएर ६० वर्षीय मधुसुदन खनाल मेला स्थल प्रवेश गर्दै थिए।

खनाल तरुकाबाट करिब १ घण्टा टाढा रहेको बासीबुढा टोलबाट लालेलाई लिएर आएका थिए । मेला स्थलनजिकै आइपुगेपछि लाले एक्कासी मुर्मराउँदै उनीमाथि नै जाइलाग्यो।

केहीबेरको घम्साघसीपछि लालेलाई नियन्त्रणमा लिइयो । खनाल समान्य घाइते भए । उनको कन्चटमा चोट लागेको थियो । उनको प्राथमिक उपचार गरियो।

केहीबेरपछि उनले लालेलाई रत्ने नामक गोरुसँग जुधाए । जसमा लालेले जित हासिल गर्‍यो । लाले केही अराजक भएर मुर्मुराउँदै आफूमाथि जाइलागेको खनालले बताए । आफैंमाथि जाइलागेको लालेको जितपछि भने खनाल खुसी देखिए ।

सामान्य घाइते भएतापनि जितका लागि गरिएको ६ महिना लामो तयारीको प्रतिफल पाएकोमा उनी दंग देखिन्थे । मेला आयोजक समितीका सदस्य तथा प्रचारप्रसार विभाग प्रमुख बिष्णु तारुकेले यसपल्टको मेलामा २२ हल गोरु जुधाइएको जानकारी दिए । 

गोरु जुधाउनका लागी करिब ६ महिना अघि देखिनै तयारी सुरु गरिन्छ । कोदो, अण्डा, तेल , मास आदि खाना खुवाएर गोरुलाई जुधाउनका लागि तयार पारिन्छ ।  जुधाउने अधिल्लो दिन भिजाएको चामाल खुवाउने गरिन्छ ।  गोरु मूल्यांकन समितिले जुधाउने गोरुहरुको मूल्यांकन गरेपछि मात्रै जुधाउनका लागि छनौट हुने तारुकेले बताए । मेला करिब ६ हजारले अबलोकन गरेका थिए ।

annapurnapost.com  बाट