जब नविन र जर्मन राइडरबीच अस्पतालमै विवाह भयो…

काठमाडौं । सबै कुरा सामान्य नै चलेको भए नेपाली राइडर नविन गिरी र जर्मन नागरिक इंकाबीच २७ मंसिरमा चन्द्रागिरिमा विवाह हुने थियो ।आफन्त र साथीभाइलाई पनि दुवै पक्षले चन्द्रागिरिमा बोलाइसकेका थिए । विवाहका लागि इंकाका बुबाआमा र ठूली आमा जर्मनीबाट काठमाडौं ओर्लिएका थिए ।तर, २६ गते राति नविनलाई एक्कासी थाम्नै नसक्ने गरी पेट दुख्यो । राति २ बजे नै धुम्बाराहीस्थित ह्याम्स अस्पाल लैजानुपर्‍यो । नविनका दाजु प्रकाशदेवका अनुसार चिकित्सकले उनलाई एपेन्डिसाइिटस भएको भन्दै ११ बजेभित्रै शल्यक्रिया गरिसक्नुपर्ने बताए ।‘शल्यक्रिया नगरी नहुने भएपछि विवाह रद्ध होला जस्तो भयो, पार्टीहरु पनि क्यान्सिल गर्‍यौं’, प्रकाशले अनलाइनखबरसँग भने ।शल्यक्रिया सफल भयो । तर, इंकाका बुबाआमासँग धेरै समय थिएन ।

‘सार्दा माघसम्म लैजानुपर्ने भयो, बुबाआमाको टिकट १५/२० दिनको मात्रै थियो’, उनले भने, ‘भिसाको समस्या हुने भएपछि गुरुबासँग कुरा गर्‍यौं ।’पूर्वनिर्धारित बिहान ८:३४ को साइत नाघिसकेको थियो । ‘गुरुबाले त्यही समयमा राति गर्न मिल्ने बताउनुभयो’, प्रकाशले थपे, ‘एपेण्डिसाइटिसको विरामीलाई दायाँबायाँ गर्न पनि अफ्ठ्यारो हुन्छ, त्यसैले अस्पतालमै विवाह गर्ने निर्णय गर्‍यौं ।’त्यसपछि सीमित आफन्त, चिकित्सक र नर्सको उपस्थितिबीच ह्याम्स अस्पतालको ९१५ नम्बर बेडमा नविन र इंकाबीच विवाह भयो । चिकित्सक र नर्सले पनि दुवैलाई बधाई दिँदै अस्पतालमै विवाह भएको यो सम्भवतः पहिलो घटना हुनसक्ने बताए ।‘भाइबुहारीको बिहे साह्रै रमाइलो र तामझामका साथ गर्ने रहर हुँदा हुँदै पनि स्वास्थ्यले साथ दिएन’, दाइ प्रकाश भन्छन् । अहिले नविनलाई अस्पतालले डिस्चार्ज गरिसकेको छ । र, उनको स्वास्थ्य स्थिति राम्रो छ ।परिवारिक स्रोतका अनुसार दुईबीच गत वर्ष चैतमा हलेसी राइडमा जाने क्रममा चिनजान भएको थियो ।