चितवनमा भयावह बन्दै लागुऔषध, क्याम्पसको मिनी गेटमा विद्यार्थीको झोला चेक

महतोका अनुसार विद्यार्थीको झोला चेकजाँच गर्ने क्रममा उनीहरुका साथबाट लागुऔषध बरामद गरिएको खण्डमा विद्यार्थीको अभिभावकलाई बोलाएर क्याम्पस प्रशासनले निष्काशन गर्दै आएको छ । उहाँले भन्नुभयो, ‘पछिल्लो समय लागुऔषध प्रयोग गर्ने किशोरकिशोरीको संख्या बराबर रहेको छ, केटाले खुलेआम प्रयोग गर्छन् भने केटीले लुकाएर लागुऔषध प्रयोग गर्छन् ।’ महतोले सप्तगण्डकी बहुमुखी क्याम्पसमा हिजो (बिहीबार) देखि ११ र १२ का विद्यार्थीहरुको झोला चेकजाँच कार्य सुरु गरिएको जानकारी दिनुभयो । उहाँका अनुसार क्याम्पसको मिनी गेटमा चेकजाँच गर्दा विद्यार्थीको झोलामा मोबाइल तथा अन्य प्रतिबन्धित सामान भेटेमा क्याम्पस प्रवेश गर्न दिइने छैन ।

जिल्ला प्रहरी कार्यालय चितवनका सूचना अधिकारी एवम् प्रहरी नायब उपरीक्षक विजयराज पण्डितका अनुसार सहरीकरणका कारण पछिल्लो तीन वर्ष लागुऔषधको घटना बढेको छ । आर्थिक वर्ष २०७९/८० को मंसिरसम्म चितवन प्रहरीले लागुऔषधको मुद्दामा ७२ जनालाई पक्राउ गरेको छ । जसमध्ये ६३ जना नेपाली र ९ जना भारतीय छन् । ४४ जना विरुद्ध लागुऔषधको मुद्दा दर्ता भएको छ ।

आर्थिक वर्ष २०७८/७९ मा लागुऔषधको मुद्दामा १७० जनालाई पक्राउ गरिएको उपरीक्षक पण्डितले जानकारी दिनुभयो । पक्राउ परेकामा १५४ पुरुष, ११ महिला र ५ बालक रहेका छन् । तीमध्ये १०६ जना विरुद्ध लागुऔषधको मुद्दा दर्ता भएको छ । त्यस्तै आर्थिक वर्ष २०७७/७८ को तथ्याङ्कअनुसार प्रहरीले लागुऔषध मुद्दामा १३६ जनालाई पक्राउ ग¥यो । जसमा १२८ पुरुष, ६ महिला र २ बालक रहेका छन् ।पण्डितका अनुसार लागुऔषधमा अधिकांश १८ वर्ष उमेर समूह तथा १८ वर्ष भन्दा कम उमेरका बालबालिका फस्ने गरेका छन् । ‘धेरैजसो युवायुवतीसाथी संगिनीको कारण, कस्तो हुन्छ त यो खाँदा भन्ने कौतुहलताका कारण सेवन गर्न सिक्दै जाने गरेका छन्’, उहाँले भन्नुभयो, ‘तर नेपाल सरकारको कानुनअनुसार १८ वर्ष उमेर समूहका बालबालिकालाई बालबालिका ऐन अनुसार कारबाही हुने गर्छ ।’