मन्त्रीको रेसबाट बाहिरिएको छैनः रोशन गाहा

पोखरा । नेकपा एमाले गण्डकी प्रदेश सभाको प्रमुख सचेतकमा रोशन गाहा चयन भएका छन् । बिहीबार बसेको एमाले संसदीय दलको बैठकले मुख्यमन्त्री तथा नेता खगराज अधिकारीको प्रस्तावमा गाहालाई प्रमुख सचेतक चुनिएको हो । रोशनलाई अधिकारी नेतृत्व सरकारमा मन्त्री बनाउने चर्चा थियो । तर उनलाई प्रमुख सचेतक बनाएर मन्त्रीको रेसबाट बाहि¥याइएको अड्कलबाजी हुन थालेको छ । यद्यपि गाहाले आफू मन्त्री बन्ने रेसबाट बाहिर नभएको बताएका छन् । ‘प्रमुख सचेतकको जिम्मेवारी त सुरुबाटै थियो । यो बाहिर आएको थिएन । बिहीबारको बैठकले औपचारिक निर्णय गरेपछि मात्र सबैले थाहा पाउनुभयो,’ सांसद गाहाले भने, ‘प्रमुख सचेतक हुँदैमा म मन्त्री हुँदिनँ भन्ने छैन । अझै सम्भावना धेरै छन् । मेरो विगत, क्षमता, पार्टीमा योगदान यी सबै विषयमा पार्टीलाई जानकारी छ । उचित समयमा मलाई त्यो अवसर पनि आउन सक्छ । पार्टी सिस्टममा पार्टीले गरेको निर्णय नै अन्तिम हुन्छ ।’

गण्डकी प्रदेश सभामा दोहोरिएर निर्वाचित भएका गाहालाई गण्डकी प्रदेश सरकारको मन्त्रीको बलियो दाबेदारको रुपमा हेरिएको थियो । गाहा ०७४ को निर्वाचनमा पनि प्रदेश सभा सदस्य निर्वाचित भएका थिए । पृथ्वीसुब्बा गुरुङ मुख्यमन्त्री भएको बेला पनि मन्त्रीको दाबेदार थिए । तर, त्यस पटक पनि उनी मन्त्री बन्न पाएनन् । उनी पृथ्वीसुब्बा नेतृत्वको सरकार ढलेपछि प्रदेशसभामा सार्वजनिक लेखा समिति सभापति भएका थिए ।

यस पटक पुन प्रदेश सभामा निर्वाचित भएपछि एमाले वृत्तमा उनी पहिलो चरणमै मन्त्री बन्ने चर्चा भएका बेला उनलाई प्रमुख सचेतकको जिम्मेवारी दिँदा उनी अब मन्त्रीको रेसबाट बाहिरिएको चर्चा छ । एमाले एक सांसदले थापालाई प्रमुख सचेतक बनाएर उनको मन्त्री बन्ने चर्चा यतिमै सीमित भएको बताए । ‘एउटा व्यक्तिले धेरै पद पाउने कुरा पनि भएन । उहाँ प्रदेश सभामा सत्ता गठबन्धनको प्रमुख दलको प्रमुख सचेतक भएपछि मन्त्री बन्ने र सरकारले पनि उनैलाई मन्त्री बनाउने सम्भावना सकिएको जस्तो लाग्छ,’ ती नेताले भने ।