सबै बैंकको आधारदर बढ्यो, ऋणको ब्याजदर झन् महँगो हुने

काठमाडौ । बैंकहरूको आधारदर निकै बढेको छ । योसँगै कर्जाको ब्याजदरसमेत बढ्ने देखिएको छ । पुस मसान्तसम्म सार्वजनिक गरेको बैंकहरूको प्रतिवेदनअनुसार २० वटै वाणिज्य बैंकको आधारदर (बेसरेट) १.९९ प्रतिशत देखि ३.५३ प्रतिशतसम्म बढेको हो ।यो प्रतिवेदको आधार दर माघदेखि लागू हुने भएकाले ब्याजदर स्वाभाविकरूपमा बढ्ने सिभिल बैंकका प्रमुख कार्यकारी अधिकृत सुनिल पोखरेलले बताए । उनका अनुसार वैशाखसम्म यो बेसरेटको प्रभाव देखिनेछ ।नबिल बैंकका डेपुटी सीईओ मनोज ज्ञवालीले आधारदर बढ्दा पुराना ऋणको ब्याजदर नघट्ने बताए । नयाँ ऋणीको हकमा बैंकहरूले प्रिमियम कम गरेर केही कम ब्याजमा ऋण प्रवाह गर्न भने सक्ने उनको भनाइ छ ।

बैंक तथा वित्तीय संस्थाहरूबाट कर्जा प्रयोग गर्ने ऋणीलाई समान रूपले लागू हुने तथा स्पष्टसँग पहिचान गर्न सकिने कर्जाको ब्याजदर निर्धारणका तत्वहरू समावेश गरिएको दर नै आधार ब्याजदर हो । यसकारण आधार दर कर्जा प्रवाहको वास्तविक ब्याजदर नभई ब्याजदर निर्धारण गर्ने आधारमात्र हो । यही आधारमा टेकेर बैंकहरूले कति प्रतिशत थप गर्ने हो निर्धारण गर्छन् ।बैंकहरूले हरेक त्रैमासमा आधारदर प्रकाशित गर्न पाउँछन् । पुसमा बढाएर आधारदर प्रकाशित गरेका बैंकहरूले आधारदर पुनरावलोकन गर्न चैतमसान्तसम्म कुर्नुपर्ने देखिन्छ ।केही दिनअघि निक्षेपको ब्याजदर घटाएका बैंकहरूले क्रमश: कर्जाको ब्याजदरसमेत कम हुँदै जाने आँकलन गरेका थिए । तर, आकाशिएको आधारदरले ऋणीलाई झन मारमा पार्ने देखाएको छ ।अहिले सबैभन्दा कम आधारदर नेपाल स्ट्याण्डर्ड चार्टड बैंकको ९.६७ प्रतिशत छ । यस्तै एकल अंकको आधारदर नेपाल बैंक, राष्ट्रिय वाणिज्य बैंक र एभरेष्ट वाणिज्य बैंकको मात्र देखिएको छ । अन्य बैंकभन्दा तुलनात्मकरूपमा यी बैंकका ऋणीले कम ब्याजदरमा ऋण पाउने सम्भावना देखिएको छ ।

हिमालयन बैकसँग मर्जरको प्रक्रियामा रहेको सिभिल बैंकको सबैभन्दा बढी आधारदर छ । लक्ष्मी, माछापुछ्रे, प्राइम, सनराइज, कृषि विकास, प्रभु, एनआईसी एसिया र सिटिजन्स बैंकको आधारदर ११ प्रतिशतभन्दा बढी छ । नेपाल एसवीआई, एनएमबी बैंक, हिमालयन, ग्लोबल आईएमई बैंकको आधारदर भने ११ प्रतिशतभन्दा कम छ ।