मध्यविन्दु–२ को सितापुरमा जनतासिद्ध विद्यालय स्थापना

चोरमारा । नवलपरासी पूर्व नवलपुरको मध्यविन्दु नगरपालिका – २ सितापुरमा बाढीको कारण विद्यालय बिस्थापित भएको स्थानमा २२ वर्षपछि विद्यालय स्थापना भएको छ । सितापुरमा रहेको श्री जनतासिद्ध निम्न माध्यामिक विद्यालय २०५७ सालमा नारायणी नदीमा आएको बाढीको कारण बिस्थापित भएको थियो । नारायणी नदीमा आएको बाढीले बस्ती कटान र डुवान गरेपछि बस्तीसंगै विद्यालय पनि बिस्थापित बन्न पुगेको थियो । विद्यालय बिस्थापित भएको २२ वर्षपछि सोही स्थानमा शुक्रबार नयाँ वर्षको अवसर पारेर मध्यविन्दु नगरपालिकाका नगर प्रमुख भिमलाल अधिकारीले विद्यालयको उद्घाटन गर्नुभयो । २०२६ सालमा स्थापना भएको जनतासिद्ध निमावि २०५७ सालको बाढीको कारण सितापुरबाट बिस्थापित भएपछि लुसलहरीको तत्कालिन अमर प्रा.वि भएको स्थानबाट सञ्चालन भएको थियो । एउटै परिषरबाट दुई वटा विद्यालय सञ्चालन भएको केही वर्ष पछि दुई विद्यालय गाभिएर जनतासिद्ध अमर माध्यामिक विद्यालय बनेको थियो । त्यसबीचमा बाढी र डुवानको कारण बिस्थापित भएका स्थानीयहरु क्रमशः बस्ती फर्किएपनि गाउँबाट बिस्थापित भएको विद्यालय भने फर्किएन । विद्यालय बिस्थापित भएपछि सितापुर नन्दपुर सेहरीका विद्यार्थीहरुले अहिले अध्ययनको लागि अन्य क्षेत्र जानु पर्ने बाध्यता रहेको छ । विद्यालय स्थापना पछि गुणस्तरीय शिक्षाको लागि अन्य क्षेत्र पुग्नुपर्ने बाध्यता हट्ने विश्वास अभिभावकहरुको छ ।

विगतमा विद्यालय सञ्चालनमा रहेको र भौतिक संरचना समेत भएको स्थानमा विद्यालय स्थापनापछि अब गाउँमा नै विद्यार्थीले गुणस्तरीय शिक्षा पाउने नगर प्रमुख भिमलाल अधिकारीले बताउनुभयो । शुक्रबार स्थापना भएको जनतासिद्ध विद्यालयको सञ्चालनको सम्पूर्ण जिम्मेवारी नगरपालिकाको हुने भन्दै उहाँले अभिभावकहरुले कुनैपनि शुल्क बुझाउन नपर्ने बताउनुभयो ।

संविधानले शिक्षालाई निशुल्क बनाएपनि स्रोतको उपलब्धता लगायतको कारण सामुदायिक विद्यालयमा पनि विभिन्न सहयोगहरु अभिभावकहरुबाट संकलन गर्नुपर्ने बाध्यता हालको अवस्थामा रहेको भन्दै अधिकारीले नगरपालिकामा क्रमश सबै सामुदायिक विद्यालयहरुलाई पूर्ण निशुल्क गराउने योजनामा अगाडी बढेको बताउनुभयो । पहिलो चरणमा शुक्रबार स्थापना भएको जनतासिद्ध र मध्यविन्दु नगरपालिकाको पहाडी क्षेत्रको वडा नं. १४ का सबै विद्यालयहरुमा सबै व्यवस्थापन नगरपालिकाबाट गर्ने गरी काम भइरहेको उहाँले बताउनुभयो । मध्यविन्दु नगरपालिकाको शैक्षिक अवस्था सुधारलाई पहिलो प्राथमिकतामा राखेर अहिले कामहरु भइरहेको भन्दै उहाँले सबै पक्षको सकरात्मक सहयोगको नगरपालिकाले अपेक्षा राखेको बताउनुभयो ।

मध्यविन्दु नगरपालिका शिक्षा अधिकृत कृष्ण रेग्मीले अभिभावकहरुको माग, नगर शिक्षा समिति र नगरकार्यपालिकाको निर्णय अनुसार विद्यालय स्थापना भएको भन्दै विद्यालय स्थापनाको लागि सहयोग गर्ने सबैलाई धन्यवाद व्यक्त गर्नुभयो ।