सुरु भयो बुटवल–बसन्तपुर केबलकार यात्रा

बुटवल । बुटवलबाट पाल्पाको बसन्तपुरसम्म चल्ने लुम्बिनी केबलकार सोमबारदेखि व्यवसायिक रुपमा सञ्चालनमा आएको छ ।कुल ५ अर्ब रुपैयाँ लागतको आयोजनामध्ये पहिलो चरणमा केबलकारमा डेढ अर्ब लगानी भएको छ भने माथिल्लो स्टेसनमा साढे ३ अर्ब लागतमा पाँचतारे होटेल, क्यासिनो र ७ सय जना क्षमताको सेमिनार हल लगायत संरचना निर्माण हुने क्रममा छन् ।२०७७ फागुन १ गते तत्कालीन प्रधानमन्त्री केपी शर्मा ओलीले शिलान्यास गरेको केबुलकार एक वर्षभित्र सञ्चालनमा ल्याउने भनिए पनि कोराना महामारीको असरका कारण निर्धारित समयभन्दा केही ढिला सञ्चालनमा आएको हो ।

सोमबार केबलकारको तल्लो स्टेशनमा पण्डितहरुबाट धार्मिक विधि अनुसार पूजाआराधना गरेपछि केबलकार सञ्चालन भएको हो ।टवलको वडा नं ३ मा तल्लो स्टेशन र पाल्पाको तिनाउ गाउँपालिका वडा नं ३ बसन्तपुरमा माथिल्लो स्टेशन रहेको केबलकार २.६ किलोमिटर दुरीको छ । बटम स्टेशनबाट १० मिनेटमा टप स्टेशनमा पुग्न सकिन्छ ।एउटा गोण्डालामा आठ जना यात्रा गर्न मिल्ने २५ वटा गोण्डाला रहेको केबलकारले दैनिक ६ हजार यात्रुलाई ओसारपसार गर्न सक्ने लुम्बिनी केबलकार प्रालिका अध्यक्ष चन्द्र ढकालले बताए ।केबलकारको टप स्टेशन बसन्तपुरमा कामाख्या देवीको आकर्षक मन्दिर बनाइएको छ । कामाख्यादेवी मन्दिर र बसन्तपुरकोे चिसो हावापानीले विशेष गरी भारतीय पर्यटक र हिन्दु धर्मावलम्बीलाई आकर्षित गर्ने अध्यक्ष ढकालले बताए ।टप स्टेशनमा पाँचतारे होटेल र क्यासिनो बनेपछि दैनिक ५ हजार भारतीय पर्यटक भित्र्याउने लक्ष्य रहेको अध्यक्ष ढकालले बताए ।

तल्लो स्टेसन समुद्री सतहबाट दुई सय ३० मिटर र माथिल्लो स्टेसन नौ सय ४० मिटरको उचाइमा रहेको छ ।सातवटै प्रदेशमा केबलकार सञ्चालन गर्ने योजनामा रहेको आईएमई ग्रुपको यो तेस्रो केबलकार हो ।यसअघि चन्द्रागिरी र मौलाकालिका केबलकार सञ्चालनमा आइसकेका छन् । लुम्बिनी केबलकार सञ्चालनले पाल्पाको बसन्तपुरमा नयाँ पर्यटकीय गन्तव्य थपिएको र पर्यटकको बसाइ लम्बाउन सहयोग पुग्ने निजी क्षेत्रको विश्वास छ ।केबलकार सञ्चालनले प्रदेश राजधानी दाङ सर्दा खस्केको रुपन्देहीको ब्यापार व्यवसायमा सुधार आउने अपेक्षा रहेको नेपाल उद्योग वाणिज्य महासंघ लुम्बिनीका अध्यक्ष कृष्णप्रसाद शर्माले बताए ।तिनाउ गाउँपाकिलाका अध्यक्ष प्रेम श्रेष्ठले केबलकार सञ्ञालनले गाउंपालिकाको विकासमा ठूलो योगदान पुग्ने बताए । केबलकारले बुटवल उपमहानरपालिका र तिनाउ गाउँपालिकालाई प्रत्येक टिकट शुल्को २ प्रतिशत सेवा शुल्क वापत छुट्याएको छ ।