भालुवाङ-प्यूठान सडकको सुख्खा पहिरो उस्तै, खुलेन सवारी

सडकको माथि चट्टानी भीर र तलतिर माडी नदी भएकोले पैदल मार्गसमेत नहुँदा यात्रुलाई पैदल यात्रा गर्न समस्या भएको स्थानीयले गुनासो गरेका छन् । भालुवाङ-प्यूठान तथा रोल्पाको एकमात्र सडक खण्डमा पहिरो रोकेपछि आवतजावत गर्न समस्या भएको छ ।साथै टाढाको यात्रा गर्ने यात्रुहरूले वैकल्पिक बाटो (देविस्थानदेखि घोराहीसम्मको ४८ किलोमिटर) हुँदै यात्रा गर्न सडक विभागले अनुरोध गरेको छ । पहिरोको केही भाग हटाए पनि फेरी माथिबाट ढुंगा माटो खस्दा समस्या उत्पन्न भएको जिल्ला प्रहरी कार्यालय प्यूठानले जानकारी दिएको छ ।सडक डिभिजन कार्यालय प्यूठानले शुक्रबार पनि बिहानैदेखि बाटो खुलाउने काम जारी राखेको जिल्ला प्रहरी कार्यालय प्यूठानका प्रहरी प्रमुख डीएसपी सुवास खड्काले जानकारी दिए ।‘पन्छाउने काम चलिरहेको छ, अहिलेसम्मकै ठूलो सुख्खा पहिरो हो । सडकदेखि करिब ५० मिटरमाथि र बाटोको एक सय ५० मिटर फराकिलो क्षेत्रमा पहिरो फैलिएको छ’, उनले भने ।