कावासोती खानेपानीले धारा जडानमा दश हजार छुट दिने

नवलपुर । कावासोती नगरपालिकामा स्थित कावासोती खानेपानी तथा सरसफाइ उपभोक्ता संस्थाले खानेपानीको धारा जडानमा दश हजार छुट दिने भएको छ । खानेपानीको आज बसेको १८ औँ बैठकले धारा जडानमा छुट दिने निर्णय गरेको कावासोती खानेपानी तथा सरसफाइ उपभोक्ता संस्थाका अध्यक्ष दिपकराज लम्सालले बताउनुभयो ।

कावासोती खानेपानी तथा सरसफाइ उपभोक्ता संस्थाको यस अघि सम्पन्न साधारणसभामा भएको निर्णय अनुसार खानेपानी धारा जडानमा छुट दिन लागिएको अध्यक्ष लम्सालले बताउनुभयो । कावासोती खानेपानी तथा सरसफाइ उपभोक्ता संस्थाको कार्यक्षेत्र भित्र विसं २०८० असार मसान्त भित्र घर निर्माण सम्पन्न भएका तर खानेपानीको  धारा जडान नगरेका घरपरिवारलाई दश हजार  छुटमा धारा जडान गरिदिने अध्यक्ष लम्सालले बताउनुभयो ।

आउँदो बैशाख १५ गते सम्ममा धारा जडानका लागि आउने त्यस्ता परिवारलाई दश हजार सम्म छुटमा धारा जडान गरिने उहाँले बताउनुभयो । खानेपानीको धारा जडानका लागि १५ हजार ९२५ लाग्नेमा यसमा दश हजार छुट हुनेछ ।  बैठकले विधान संशोधनका लागि समेत समिति निर्माण  गरेको छ ।