चाडपर्व नजिकिएसँगै नवलपुरमा कपडाको तस्करी

कावासोती । पछिल्लो समय चाडपर्व नजिकिएसँगै नवलपुरमा तस्करी बढेको छ । विशेषगरी भारतबाट नेपाल भित्र्याइने लत्ताकपडाका पोकाहरू तस्कर समूहले भन्सार छलेर नवलपुर भित्र्याइ रहेका छन् । लत्ताकपडाको भन्सार मूल्यांकन बढी हुँदा तस्कर समूह चोरी निकासीको बाटो प्रयोग गरी लत्ताकपडा भित्र्याउन अहिले सीमा नाकामा सलबलाइरहेका छन् । तिजलाई मध्यनजर गरी पूर्वी नवलपरासी र पश्चिम नवलपरासीका बजारमा लत्ताकपडाको माग उच्च रहेको छ। पूर्वी नवलपरासीका व्यापारीहरू सीमा क्षेत्रका कारोबारी समातेर लत्ताकपडा भित्र्याउँछन्।

व्यापारीले एक पोका कपडाबराबर १५ देखि २० प्रतिशत क्यारिङ खर्च कारोबारीलाई दिने गरेको व्यापारी स्रोतको दाबी छ । त्यही प्रतिशतमा कारोबारीले व्यापारीको पसल र गोदामसम्म पु¥याउने गर्दै आइरहेको छ। त्यही १५ देखि २० प्रतिशतको लोभमा कारोबारीले भन्सार छाडेर तस्करी बाटो रोज्ने गरेका छन्। कारोबारीले तस्करीको माध्यमबाटै लत्ताकपडा भित्र्याउन खोजिरहेको घटना प्रहरीले सामान समातेपछि मात्र सार्वजनिक हुने गरेको छ। सशस्त्र प्रहरी र नेपाल प्रहरीसँग सेटिङमा कारोबारीले भन्सार छलेर धमाधम लत्ताकपडा भित्र्याइरहेका छन् । एक व्यापारीको अनुसार भन्सार छलेर कपडा वर्दघाटमा जम्मा गर्ने र त्यसपछि पूर्वी नवलपुरको बाटो हुदै कावासोती , चितवन, काठमाडौं सम्म कपडाको तस्करी हुने गरेको बताए । उनले भने तिन जना महिला प्रयोग गरेर कावासोती सम्म त वर्दघाटमा कपडा जम्मा गरेका तस्करले एक साता अगाडी कावासोतीको कपडा पसलमै पठाएका थिए । सोही समयमा हाम्रो अगाडी नै प्रहरीको घुमुवालाई भेट गरेका थिए ।

सेटिङ नमिले , जिल्ला वा प्रदेश प्रहरी प्रमुखलाई तस्करीको विषयमा कसैले सूचना दिएपछि मात्र सशस्त्र प्रहरी र नेपाल प्रहरीले कपडा बरामद गर्ने गरेका घटनाहरू यस अघि पनि बाहिरीएका थिए । तर पछिल्लो समय पूर्वी र पश्चिम जिल्लाका प्रहरीहरुले तस्करी नियन्त्रणमा खासै चासो देखाएको देखिदैन् । प्रहरीको चेकिङ अगाडीबाटै दिनहुँ लत्ताकपडा भित्रिँदा समेत प्रहरीहरु अनविज्ञ भएर बसेका देखिन्छ । त्रिवेणी र महेशपुर भन्सार कार्यालयको विगतको तथ्यांक केलाउँदा असार, साउन र भदौमा ठूलो परिणाममा लत्ताकपडा भित्रिने गरेको थियो। तर अहिले पहिले जस्तो परिणाममा लत्ताकपडा नआएको भन्सारका कर्मचारी बताउछन् । चोरी निकासीको बाटो भएर लत्ताकपडा भित्रिँदा भन्सारको राजस्‍वमा कमी आएको छ । बजारमा प्रशस्त मात्रामा लत्ताकपडा गइरहेको छ, कहाँबाट गइरहेको छ, त्यो सबैले अनुमान लगाउन सक्छ । चाडपर्वलाई लक्षित गरी चोरी तस्करी नियन्त्रणका लागि प्रहरी परिचालन गरेको दाबी गरे पनि त्यसको प्रभावकारीता देखिएको छैन् ।