मध्यबिन्दुका ७२ जना विद्यार्थीलाई शैक्षिक सामाग्री वितरण

असोज १२ गते नारायणी नदीमा आएको बाढीले क्षति पुर्‍याएको उक्त विद्यालयको मर्मत गरेर बालमैत्री कक्षा निर्माण गरिएको जागृति बाल तथा युवा सरोकार नेपालका महासचिव दिपक शर्माले बताउनुभयो । करिब १० लाख रुपैयाँको लागतमा ३ वटा कक्षा रङरोगन, भित्तेलेखन, ईसीडी कक्षाको व्यवस्थापन गरिएको उहाँले बताउनुभयो । कक्षाकोठाको व्यवस्थापन र बालमैत्री कक्षाको वातावरणसँगै सो विद्यालयमा अध्ययनरत ७२ जना छात्रछात्रालाई झोला, ट्रयाकसुट, कपि, पेन्सिल, साबुन, ब्रस र टुथ पेस्ट वितरण गरिएको हो ।

मध्यबिन्दु नगरपालिकाका नगर प्रमुख भिमलाल अधिकारीले गत असोजमा गएको बाढीले मध्यबिन्दु नगरपालिकामा निकै नै क्षति पुर्‍याएको र उक्त समयमा संस्थाले नगरपालिकासँगको समन्वयमा करिब ६०/७० लाख बराबरको राहत वितरण गरि नगरमा सहयोग पुर्‍याएको स्मरण गर्दै संस्थाले विद्यालयमा गरेको सहयोगको लागि धन्यवाद ज्ञापन गर्नुभएको थियो । मध्यविन्दु नगरपालिकाले सामुदायिक विद्यालयमा विद्यार्थीहरुलाई आकर्षण बढाउन विभिन्न योजना निर्माण गरिएको र पालिकामा हाम्रो खुसी पाठयक्रम लागु गरिएको उहाँले बताउनुभयो । बालबालिका नै लगानीको मुख्य आधार भएकाले नगरपालिकाले विशेष प्राथमिकता साथ काम गरेको र सम्रगमा नमुना पालिका निर्माणमा लागेको उहाँले बताउनुभयो ।

शैक्षिक सामाग्री वितरण कार्यक्रम बोल्दै नेपाल हिल्फे बिटिकम किन्डर इन चिल्ड्रेन नेपालका प्रतिनिधि दिपक बस्यालले बाढीबाट समस्या परेको विद्यालयको ईसीडी कक्षा व्यवस्थापनसँगै विद्यार्थीहरुको शैक्षिक सुधारका लागि शैक्षिक सामाग्री वितरण गर्न सहयोग गरिएको बताउनुभयो । खुसी खुसी विद्यालयमा विद्यार्थीलाई पुर्‍याउने अभियान अन्तरगत विद्यालयमा सहयोग गरिएको उहाँको भनाई छ । विद्यालय नयाँ स्वरुपमा देख्दा र सबै विद्यार्थी शैक्षिक सामाग्री प्राप्त गर्दा अभिभावक र बालबालिका खुसी समेत रहेकाले शैक्षिक सुधार हुने उहाँले बताउनुभयो ।

कार्यक्रममा बोल्दै जागृती बाल तथा युवा सरोकार नेपालद्वारा मध्यबिन्दु नगरपालिकामा संचालन भइरहेको किशोरी सशक्तीकरण परियोजनामा सहभागी किशोरी रितु घर्ती मगरले परियोजनाबाट किशोरीहरुको क्षमता अभिवृद्धिमा सहयोग पुर्‍याएको बताउनुभयो ।

शैक्षिक सामाग्री वितरण कार्यक्रममा मध्यबिन्दु नगरपालिकाका उप प्रमुख पुर्णकला चौधरी, मध्यबिन्दु १५ का वडा अध्यक्ष यमबहादुर केसी, विभिन्न संघसंस्थाका प्रतिनिधिहरु, विद्यालय व्यवस्थापन समितिका पदाधिकारीहरु, शिक्षक, अभिभावक र विद्यार्थीहरुको उपस्थिति रहेको थियो ।

जागृती बाल तथा युवा सरोकार नेपालले देवचुली र कावासोती नगरपालिकामा ३/३ वर्ष किशोरी सशक्तीकरण परियोजना संचालन गरेको थियो। हाल मध्यबिन्दु नगरपालिकामा उक्त परियोजना संचालनमा रहेको छ । साथै संस्थाले गत वर्ष समेत देवचुली र कावासोतीका विद्यार्थीहरुका लागि शैक्षिक सामाग्री वितरण गरेको थियो ।