हुप्सेकोट दुर्घटना प्रकरण : गाउँपालिका उपाध्यक्षको विज्ञप्ती

कावासोती । हुप्सेकोट गाँउपालिकाकी उपाध्यक्ष स्वतन्त्र कोपिला मल्लले गाउँपालिकाको सवारीको ठक्करबाट स्थानीय ५ वर्षीय बालक दिपु गाहाको मृत्यु भएको घटनाको विषयमा नेपाली कांग्रेस हुप्सेकोट गाउँ इकाई समितिको नाममा प्रकाशित विज्ञप्ती प्रति गम्भीर ध्यानाकर्षण भएको जनाउनु भएको छ ।
गाँउपालिकाको सवारीको ठक्करबाट स्थानीय बालकको मृत्यु भएको घटनाको जिम्मेवारी गाउँपालिका उपाध्यक्ष मल्लले लिनु पर्ने भन्दै नेपाली कांग्रेस हुप्सेकोट गाउँ इकाई समितिको नामबाट विज्ञप्ती प्रकाशित भएको थियो । गाउँपालिका इकाईका कुनैपनि पदाधिकारी तथा प्रतिनिधिको हस्ताक्षर विना नै उक्त विज्ञप्ती प्रकाशित भएको थियो । उक्त विज्ञप्ती प्रति गम्भीर ध्यानकर्षण भएको भन्दै उपाध्यक्ष मल्लेले उक्त घटनाको नैतिक जिम्मेवारीको लागि प्रतिवद्धता जनाउदै विज्ञप्तीमा उल्लेख गरिए बमोजिम गाउँपालिका प्रमुखले आफुलाई सो दिन कुनैपनि किसिमको प्रशासनिक जिम्मेवारी नदिएको बताउनु भयो । घटना भएको दिन गाउँपालिका अध्यक्ष लक्ष्मी पाण्डे काठमाण्डौं रहेको कारण सो दिन गाउँपालिकामा भएको घटनाको जिम्मेवारी उपाध्यक्ष मल्लले लिनु पर्ने यस अघि नेपाली कांग्रेस गाउँ इकाईको नाममा प्रकाशित विज्ञप्तीमा उल्लेख गरिएको थियो । तर, उपाध्यक्ष मल्लले जनप्रतिनिधि निर्वाचित भएदेखि हाल सम्म गाउँपालिका अध्यक्ष पाण्डेले आफुलाई कुनैपनि दिन कार्यवहाक जिम्मेवारी प्रदान नगरेको र सो दिन पनि उहाँ कहाँ जानुभएको विषय आफुलाई जानकारी नभएको र सो दिन अध्यक्ष पाण्डेले आफुलाई कुनै जिम्मेवारी प्रदान नगरेको उहाँले विज्ञप्तीमा उल्लेख गर्नु भएको छ ।
यस अघि नेपाली कांग्रेस हुप्सेकोट गाउँ इकाईको नामबाट प्रकाशित विज्ञप्तीमा गाउँपालिका अध्यक्ष लक्ष्मी पाण्डे माथि गाउँपालिका परिसरमा प्रशासनको अगाडी नै दुव्र्यवहार र हातपात भएको भन्दै घोर आपत्ती एवम् खेद प्रकट भएको जनाइएको छ । घटनालाई अनावश्यक राजनितिकरण भएको विज्ञप्तीमा जनाइएको छ ।
हुप्सेकोट गाउँपालिकाको ग १ ज ३८९ नम्बरको जीपले ठक्कर दिदाँ स्थानीय दिपु गाहाको मृत्यु भएको थियो भने ४ जना घाईते भएका थिए । स्थानीयका अनुसार गाउँपालिकाका पशासन शाखा अधिकृत शिव सुवेदीले गाउँपालिकाको सवारी सिक्ने क्रममा दुर्घटना भएको भन्दै सुवेदीलाई कारवाही र पीडितलाई क्षतिपूर्ति दिनुपर्ने माग राख्दै गाउँपालिका र वडा कार्यालयमा तालाबन्दी गरेका थिए । सुवेदीलाई पक्राउ गर्न वारेन्ट जारी भइसकेको कारण तत्काललाई आइतबार देखि वडा कार्यालयको तालाभने खोलिएको छ । गाउँपालिकामा लगाईएको ताला भने सुवेदीलाई पक्राउ गरेपछि मात्रै खोलिने स्थानीयले विज्ञप्ती मार्फत जनाएका छन् ।