उजुरी पेटिकामा उजुरी छैन

दयाराम आचार्य
कावासोती । नवलपरासी पूर्वको कावासोतीमा रहेको नेपाल टेलिकम शाखाले आफ्नो परिसरमा भएको उजुरी पेटीका हटाएको छ । उजुरी पेटीकामा उजुरीनै नपर्ने कारणले उजुरी पेटीकानै हटाएको कार्यालयले जनाएको छ । नवलपरासी पूर्व नवलपुरको कावसोतीमा केही समय पहिला खुलेका सरकारी कार्यालयहरु कतिपयले उजुरी पेटीकानै राखेका छैनन् ।
जिल्ला समन्वय समितिको कार्यालय, यातायात व्यवस्था कार्यालय , लगाएतका कार्यालमा उजुरी पेटीकानै छैनन् । कतीपय कार्यालयका उजुरी पेटीका माकुराको जालोले घेरीएका छन् । कहीं खिया लागेर उजुरी पेटीकानै थोत्रा भएकाछन् । सेवाग्राहीका सल्लाह, सुझाव र गुनासो सुन्नका लागि सुशासन ब्यवस्थापन ऐन २०६४ अनुसार हरेक सरकारी कार्यालयमा उजुरी पेटीका राख्नुपर्ने प्रावधान रहेको छ । तर उजुरी पेटीकामा उजुरी पर्न छाडेपछी केही कार्यालयले उजुरी पेटीका नराखेको जनाएका छन् । नेपाल टेलीकम कावासोती शाखाका तीन बर्ष पहिले उजुरी पेटीका राखिएको थियो । अहिले केही समय अघि उजुरी पेटीका निकालीएको छ । लिखीत रुपमा उजुरी नपरे पछी कार्यालयले उजुरी पेटीका हटाएको कार्यालयका कर्मचारी मुकुल आचार्य जानकारी दिए । ‘तीन वर्ष सम्ममा एउटा पनि लिखित उजुरी परेन ,त्यसैले हामिले उजुरी पेटीका हटाईदियौं ’ आचार्यले भने– अनलाईन प्रणालीबाट गुनासो गर्न सक्ने भएकाले समेत उजुरी पेटीका प्रयोग बिहिन भयो ।
प्रविधिको बिकास संगै लिखित भन्दा अन्य माध्यमबाट समेत सहज रुपमा कार्यालयका गुनासोहरु दाखिला गर्न सक्ने भएपछी उजुरी पेटीकामा लिखित उजुरी पर्न छाडेको आचार्यले बताए । ‘केही गुनासो भए मौखीक रुपमानै भन्छन्,नभए फोन गरेर भन्ने गर्छन’ विद्युत प्राधिकरण कावासोती शाखाका ईन्जिनिएर रुद्र राज बिष्ट भन्नुभयो– उजुरी पेटीकामा लिखित उजुरी पर्न छाडेकाछन् । उजुरी पेटीकामा लिखित उजुरी आउन छाडेपछी कार्यालयले उजुरी पेटीका खोल्ननै छाडेको छ । तीन,चार महिनामा कहिले काही उजुरी पेटीका खोल्ने गरेको ईन्जिनिएर बिष्टले बताए । ‘उजुरी पेटीकामा उजुरीनै हुदैन ,त्यसैले तीन ,चार महिनामा मात्र खोल्छौं ’ उनले भने । कावासोती नगरपालिका परिसरमा राखिएको उजुरी पेटीकामा बाहिरबाटै चार,पा“च ओटा लिखित उजुरी परेको देखिन्छ । केही बर्ष पहिलो उजुरी पेटीकामा उजुरी धेरैनै पर्ने गरेका थिए । अघिल्लो बर्ष एक वर्षमा एउटामात्र उजुरी परेको र अहिले केही उजुरी पेटीकामा देखीएको कावासोती नगरपालिका सूचना अधिकृत पवन रुपाखेतीले बताए । स्थानिय तहमा जनप्रतिनिधि आए संगै उजुरी कम पर्ने गरेको उनले बताए । जनप्रतिनिधि आए संगै नागरिकले सजिलै आफ्ना गुनासोहरु उनिहरुलाई भन्न सक्ने कारणले समेत स्थानिय तहमा उजुरी कम पर्ने गरेकाछन् ।
‘आफैले चुनेका जनप्रतिनिधि आफ्नै टोल ,टोलमा छन्,कार्यालयका केही गुनासो भए सहजै आफ्ना प्रतिनिधिलाई भन्न सक्छन्’ सूचना अधिकृत रुपाखेतीले भने – यसले गर्दा स्थानिय तहका उजुरी पेटीकामा कम मात्रमा उजुरी पर्ने गरेकाछन् । उजुरी पेटीकामा राखिएका उजुरीको समयमा खोलेर सुनुवाई र कार्यान्वयन चरणमा जान्छ भन्नेमा शंका भएकाले गर्दा उजुरी पेटीकाको प्रभावकारती कम भएको कावासोती नगरपालिका तीनका स्थानीयबासी ज्ञानेन्द्र थापाले बताए । शुसासन कायम गर्नका लागि कुनै अनियमितता भए गोप्य रुपमा लिखित उजुरी गर्न सकिने भएपनी समयमा सुनुवाई हुन्छ भन्ने विश्वास नागरिक तहमा नभएकाले लिखित रुपमा उजुरी गर्न छाडेको उनले बताए । उजुरी पेटीकामा लिखित उजुरी गरे पनि ,कहिले खोलिन्छ र कार्यान्वय कसरी हुन्छ भन्ने स्पस्ट नागरिक वडापत्रमानै लेखे ,यसको प्रभावकारीता बढने र सुशासन कायममा सहयोग पुग्ने थापाले बताए । अहिले कुनै गुनासो भए सहजै कार्यालय प्रमुख समक्ष भन्न सक्ने,फोन गर्न सक्ने, सामाजिक संजाल,कार्यालयले संचालन गरेका ‘वेभ साईट’मार्फत समेत गुनासो तथा अन्य सुझाव राख्न सकिने भएकाले उजुरी पेटीकामा लिखित उजुरी गर्ने क्रम घटेको थापाले बताए । तर कुनै गोप्य रुपमा गर्नु पर्ने उजुरी भए ,उजुरी पेटीका सुशासन कायमका लागि सहज माध्यम हुने भएकाले उजुरी पेटीकालाई प्रभावकारी बनाउन तर्फ लाग्नु पर्छ भन्नुहुन्छ स्थानीयबासी थापा ।