कावासोतीको बसपार्क अब कता ? बसपार्क बनाउने ठाउंमा रंगशालाको शिलान्यास

भबिश्वर पाण्डे
कावासोती । नवलपरासी (बर्दघाट सुस्ता पूर्व)को सदरमुकामको कावासोतीमा बसपार्क निर्माणको लागि डिपीयार तयार भएको स्थानमा रंगशालको शिलान्यास भएको छ । बसपार्क निर्माणको लागि डिपीयार तयार भएर निर्माण ठेक्का समेत लागेको सो स्थानमा शनिबार डणावर देवी सांस्कृति रंगशाला निर्माणको लागि शिलान्यास गरिएको छ । रंगशाला शिलान्यास राष्टिूय युवा परिषद् नेपालका कार्यकारी अध्यक्ष माधव ढुंगेलले गरेका हुन् । रंगशाला निर्माणको लागि शिलान्यास भएपछि बसपार्क निर्माणमा अन्यौलता छाएको छ ।
कावासोती नगरपालिकाले आर्थिक बर्ष २०७५÷०७६ मा तत्कालको लागि शौचालय, ४ वटा पसल, खोला तटबन्धन र बाटोको टूयाक निर्माण गर्न देबचुली निर्माण सेवालाई ठेक्का दिई सकेको छ । नगरपालिकाले हाल सम्म डिपीयार निर्माणमा बिज्ञापन सहित ३ लाख ५० हजार खर्च गरिसकेको छ ।
नगरपालिकाले डिपीयार तयार गरेर निर्माण ठेक्का समेत लगाएको स्थानमा रंगशाला निर्माण शुरु भएपछि अब नगरपालिकाको बसपार्क कता बन्ने भन्ने अन्यौलता देखिएको छ । २०७३ साल पुषमा बसेको नगरपालीकाको चौथो नगर परिषद देखी बसपार्कको चर्चा शुरु भएको थियो । तर, नगरपालिकाले हाल सम्म बिबाद कै कारण बसपार्क निर्माणको ठोस काम अगाडी बढाउन सकेको थिएन् । शुरुमा कावासोती ३ को पुर्बपश्चिम रार्जमागमा रहेको डण्डा जोडने पुलको उत्तर तर्फ पर्ने गरी बसपार्क बनाउन तयारी गर्दा उक्त्त क्षेत्रमा बिबाद आएपछि बसपार्क कावासोती १४ मा बनाउने निणर्य भएको थियो । राष्ट्रिय युवा परिषद् नेपालका कार्यकारी अध्यक्ष माधव ढुंगेलले रंगशाला निर्माणको शिलान्यास गर्दा नगरपालिकाले थाह पाएन वा थाह भएरपनि त्यसलाई रोकेन भन्ने बिषय अझ चर्चा बनेको छ । कावासोती नगरपालिकाका उपप्रमुख प्रेमशंकर मर्दनियाले रंगशाला निर्माणको बिषय समाचारमा सुनेपछि थाह भएको बताए । कावासोती नगरपालिकाले ४२ रोपनी क्षेत्रफलमा पाच वर्षको अवधिमा १३ करोड ७३ लाख ६३ हजारमा अत्याधुनिक बसपार्क बनाउन योजनाका साथ पहिलो वर्ष ठेक्का लगाएको थियो । तर, रंगशाला निर्माणको लागि शिलान्यास भएपछि भने नगरपालिकाको योजना अलपत्र पर्ने देखिएको छ । २ बिगाह १८ कठ्ठा क्षेत्रफलमा स्थानीय स्रोतसाधन र एनआरएनको सहयोगमा करिब १ करोड ५७ लाखको लागतमा रंगशाला निर्माण गर्ने लक्ष्यका रंगशाला शिलान्यास गरिएको रंगशाला निर्माण समितिका सदस्य ईन्द्रबहादुर महतोले जानकारी दिए । दुई हजार ५ सय दर्शक क्षमताको प्याराफिटसहितको रंगशालामा तत्कालै प्रवेशद्वार निर्माणको काम सुरु गरिने महतोले बताए । जनकल्याण युवा क्लबका अध्यक्ष नारायण थनेतको अध्यक्षतामा भएको शिलान्यास कार्यक्रममा खेलकुद विकास समिति नवलपुरका अध्यक्ष विकास केसी समेत सहभागिता रहेको थियो । नगरपालिकाले बसपार्क बनाउने भनेको स्थानमा रंगशाला शिलान्यास भएपछि बसपार्क निमार्ण हुने कता भन्ने अन्योलता भएको हो । यसो हुनुमा नगरपालीकाको दोष रहेको रंगशाला निमार्ण समितिका अध्यक्ष तिलक राम महतोको आरोप छ । स्थानिय संग रायबिना नै बसपार्क बनाउन खोज्दा यस्तो भएको उनले बताए ।