नवलपुर ट्राफिकले ९ हजारलाई दियो ट्राफिक शिक्षा

कावासोती । जिल्ला ट्राफिक प्रहरी कार्यालय नवलपुरले ९ हजार मानिसहरुलाई ट्राफिक सचेतना शिक्षा प्रदान गरेको छ । पछिल्लो १बर्षको अन्र्तरालमा २९ सय चालक, ४१ सय बिद्यार्थी र २ हजार सर्वसाधरणलाई प्रशिक्षण दिएको हो ।
बिहिबार जिल्ला ट्राफिक प्रहरी कार्यालयमा बर्षभरी भएका गतिबिधि सार्वजनिक गर्न आयोजना गरिएको पत्रकार सम्मेलनमा दुर्घटना न्यूनिकरणको लागि सचेतना मूलक गतिबिधिलाई मुख्य प्राथमिकता दिएको जनाएको हो ।
कार्यालय प्रमुख लक्ष्मण बहादुर शाहीले नवलपुर क्षेत्र दुर्घटनाको उच्च जोखिममा रहेकाले राज्य स्तरबाटै बिशेष कार्यक्रम संचालन गर्न जोड दिए । शाहीले भने,गत आर्थिक बर्षको पौषदेखि मंसिरसम्म १ सय २ जनाको मृत्यु भएको छ । बिशेष गरी चालकको लाहपरबाहीको कारण सवारी दुर्घटना बढीरहेको भन्दै यस तर्फ चालक र आम सरोकारवालाहरु सचेत हुन शाहीले सुझाव दिए ।
यो अबधिमा १ सय ६२ सवारी दुर्घटना भएका छन् भने सबै भन्दा बढी मोटर साईकल तथा स्कुटर दुर्घटनामा परेको ट्राफिक कार्यालयको तथ्यांकमा उल्लेख रहेको छ । ट्राफिक प्रहरीले साउनदेखि मंसिर सम्म ३९ लाख रुपैयाँ राजश्व संकलन गरेको छ । भारतसँग जोडिएको जिल्लाको त्रिबेणी क्षेत्रमा समेत ट्राफिक प्रहरी परिचालन गरिएको छ । जसबाट त्यस क्षेत्रमाहुने सवारी दुर्घटनामा कमी ल्याउन सहयोग जानकारी दिईयो ।
शाही कार्यालय प्रमुख रहेको समयमा जिर्ण अवस्थामा रहेको रिफ्रेस सेन्टरमा करिव १३ लाखको भौतिक संरचना निर्माण गरि दैनिक १ सय २० सवारी साधनलाई रातको समयमा बिश्राम गराउने गरिएको छ । यसबाट सवारी दुर्घटना न्यूनिकरणमा ठूलो सहयोग मिलेको शाहीको दाबी छ । उनले, भने यो देशकै नमूना रिफ्रेस सेन्टर बन्यो ।
शाहीले दुर्घटना सबै मानिसको सरोकारको बिषय भएकाले, यसमा सबै स्थानीयतहले समेत दुर्घटना न्यूनिकरणको लागि काम गर्न सुझाब दिएका छन् ।ट्राफिक प्रहरीसँग सिमित श्रोत साधन रहेपनि आफूहरु निरन्तर लागि परेकाले राजश्व संकलनमा बृद्धि भई दुर्घटनामा कमीआएको शाहीले बताए । गतबर्षको पौष ४ गते कावासोतीमा कार्यालय प्रमुख भएर आएका शाही मध्यपश्चिम क्षेत्रिय प्रहरी तालिम केन्द्रमा सरुवा भएका छन् ।