नवलपुरमा २० प्रतिशतले बुझे तेश्रो किस्ताको अनुदान

दयाराम आचार्य
कावासोती । नवलपरासी पूर्व नवलपुरमा भुकम्प गएको तीन वर्ष विति सक्दा जम्मा बीस प्रतिशत भुकम्प पीडीतले मात्र तेश्रो किस्ता वापतको अनुदान रकम बुझेका छन् ।
नवलपुरमा ८ सय ५१ जना भुकम्प पीडीत संग अनुदान सम्झौता भएकोमा एक सय ६९ जनाले मात्र तेश्रो किस्ता वापतको रकम बुझेका छन् । ६ सय ८२ जनाले अझै तेश्रो किस्ताको अनुदान रकम प्राप्त गर्न सकेका छैनन् ।
कर्मचारीको अभावका कारण निजी आवास पुर्ननिर्माणको कामले गति लिन नसकेको राष्ट्रिय पुननिर्माण प्राधिकरण जिल्ला आयोजना कार्यान्वयन इकाई नवलपरासीका निमित्त प्रमुख राजेन्द्र कार्कीले बताएका छन् ।
आठ सय ५२ घर भुकम्पका कारण पूर्ण रुपमा क्षती भएका थिए । जस मध्ये आठ सय ५१ घर धनी संग अनुदान सम्झौता गरिएकोमा पाँच सय ७० जनाले दोश्रो किस्ताको रकम बुझेका छन् । दोश्रो किस्ता नपाउनेको संख्या दुई सय ८१ रहेको छ । पहिलो किस्ताको रकम भने अनुदान सम्झौता भएका सबैले प्राप्त गरिसकेका छन् ।
प्राविधिकहरुको अभाव र पीडीतहरुलाई भुकम्प प्रतिरोधात्मक तालिम समयमा दिन नसक्दा पुननिर्माणमा ढिलाई भएको निमित्त कार्कीले बताए । कार्यालयमा २६ जनाको दरवन्दी भए पनी हाल १९ जना कर्मचारी मात्र छन् । प्रमुख पदका कर्मचारी नहुदा समस्या सिर्जना भएको उनले बताए ।
नवलपुरमा भुकम्पका कारण सबैभन्दा धेरै बुलिङटारमा दुई सय २४ घर भत्किएका थिए । त्यसपछी हुप्सेकोटमा एक सय ३९ र बौदीकालीमा एक सय आठ घर क्षती भएका थिए । जिल्लाको पहाडी क्षेत्रमापर्ने यी गाउँपालीकामा क्षति धेरै भएको थियो ।
निमित्त प्रमुख कार्कीका अनुसार अहिले कामलाई तिव्रता दिईएको छ । आउदो जेठ महिना सम्ममा निजि आवास पुर्ननिर्माणको काम सक्ने गरि अहिले काम भईरहेको उनले जानकारी दिए ।
प्रारम्भिक रुपमा संकलित पीडीतको भन्दा अहिले नवलपुरमा धेरै गुनासो दर्ता भएका छन् । आयोजनाको कार्यालय कावासोतीमा मंसिर तीन गतेसम्ममा एक हजार २ सय १९ जनाले गुनासो दर्ता गराएका छन् । लाभग्राहीको सुचिमा आफुहरुको नाम छुटेको भन्दै गुनासो दर्ता गर्नेको संख्या प्रारम्भिक रुपमा दर्ता भएका भुकम्प पिडितको संख्या भन्दा धेरै रहेको छ । गुनासो दर्ता गर्नेहरुको स्थलगत अवलोन पश्चात अन्य कार्य अगडी बढाईने निमित्त प्रमुख कार्कीको भनाई छ ।
३५ विद्यालय पुर्ननिर्माण हुदै
नवलपरासी पूर्व र पश्चिमा गरि दुई सय ८ विद्यालय भुकम्पका कारण क्षती भएकोमा यस आर्थिक ३५ वटा विद्यालय पुर्ननिर्माणको काम हुने जिल्ला आयोजना कार्यान्वयन इकाईको कार्यालयले जनाएको छ ।
यस आर्थिक वर्षमा नवलपरासी पूर्वमा २४ वटा विद्यालय र नवलपरासी पश्चिममा ११ वटा विद्यालयको पुर्ननिर्माणको काम हुने निमित्त प्रमुख राजेन्द्र कार्कीले जानकारी दिए । उनका अनुसार गएको दुई वर्षमा नवलपरासीमा २० वटा विद्यालयको पुर्ननिर्माणको काम सकिएको छ ।
विद्यालयमा क्षती पुगेको तर लाभग्राहीको सुचिमा सुचिकृत हुन छुटेको भन्दै केही विद्यालयले अहिले पुर्ननिर्माणको लागि नाम दर्ता गर्ने क्रम समेत जारी रहेको कार्कीले बताए ।