कावासोतीमा शेयर लगानी सम्बन्धी प्रशिक्षण

कावासोती । नवलपुरको कावासोतीमा शनिबार शेयर लगानी सम्बन्धि एक दिने प्रशिक्षण भएको छ । भिजन सेक्युरिटिज प्रालिको आयोजना एवम् रोटरी क्लब अफ कावासोती, लायन्स क्लब अफ कावासोती, नेपाल इन्स्योरेन्स कम्पनी सोसाइटी र मध्यबिन्दु सहकारी संस्थाको सहयोगमा शेयर लगानी सम्बन्धी प्रशिक्षण भएको हो ।
रोटरी क्लब अफ कावासोतीका अध्यक्ष भरत शर्मा पोखरेलको अध्यक्षतामा भएको कार्यक्रमका प्रमुख अतिथि नवलपुर उधोग वाणिज्य संघका अध्यक्ष डासुराज पोखरेल रहेका थिए । कार्यक्रममा पोखरेलले नयाँ जिल्लामा यस्ता खालका प्रशिक्षण कार्यक्रमले शेयर बजारमा लगानी गर्न नयाँ शेयरदातालाई थप मद्दत पुग्ने बताए । उनले एक दिने प्रशिक्षण कार्यक्रमबाट भरपुर फाइदा लिन सहभागीलाई आग्रह गरेका थिए । प्रशिक्षक एवम् भिजन सेक्युरिटीज प्रालिका कार्यकारी अध्यक्ष राजकुमार तिमिल्सिना र कम्पनीका कार्यकारी अधिकृत राजन तिवारीले प्रशिक्षण दिएका थिए । सहभागीलाई शेयर बजार र यसका प्रकार, शेयर बजारमा कसरी प्रवेश गर्ने, अनलाइन प्रविधिबाट कसरी शेयर कारोबार गर्ने, शेयर खरिदबिक्री गर्दा ध्यान दिनुपर्ने कुरा लगायतका विषयमा प्रशिक्षण दिइएको थियो । कार्यक्रममा पुराना शेयर लगानिकर्ता लक्ष्मीप्रसाद वस्ती, कालिगण्डकी फाउन्डेसन कावासोतीका डाइरेक्टर छविलाल थापा, नवलपुर बहुमुखी क्याम्पसका प्रमुख अर्जुन रिजाल, विभिन्न बित्तीय संस्थाका प्रमुख तथा प्रतिनिधि, कावासोतीका उधोगी, व्यापारी एवम् ब्यवसायीसहित विभिन्न संघसंस्थाका एक सय भन्दा बढीको सहभागिता रहेको थियो ।