२०८३ जेष्ठ ८, शुक्रबार

नवलपरासी प्रहरी कार्यालयमा बिचौलियालाई रोक

नमुना पोष्टप्रकाशित मिति: २०७५ पौष ९, सोमबार (७ साल अघि)

bichauliya-pilice-gate-24122018061409-1000x0

नवीन पौडेल

परासी — यहाँस्थित जिल्ला प्रहरी कार्यालयको प्रवेशद्वारनजिक पर्खालमा बिचौलियालाई प्रवेश निषेध उल्लेख गरेर पोस्टर टाँसिएको छ । प्रहरी कार्यालयमै यस्तो पोस्टर देखेपछि त्यसले धेरैको ध्यान खिचेको छ ।अन्य सरकारी अड्डामा जस्तै प्रहरीमा पनि बिचौलिया बढेपछि यस्तो लेख्नु परेको प्रहरी कार्यालयको भनाइ छ । कार्यालयमा अनावश्यक व्यक्तिको भीडभाड बढेपछि सूचना टाँसेको एक प्रहरी अधिकारीले बताए ।

जिल्ला प्रहरीमा दिनहुँ विभिन्न घटना र झगडाका उजुरी दर्ता हुन्छन् । घटनाका पक्ष र विपक्षीले आफ्नो पक्षमा बोलिदिनका लागि समर्थन गर्ने राजनीतिक दलका नेता/कार्यकर्ता, आफन्तलाई छलफलका लागि ल्याएका हुन्छन् ।

घटनासँग सम्बन्धित व्यक्तिहरू आपसमा मिले पनि उक्साउने, घटनालाई अतिरञ्जित बनाउन खोज्ने प्रवृत्ति बढेपछि प्रहरी गेटमा नै बिचौलियालाई प्रवेश निषेध लेख्नुपरेको प्रहरी अधिकारीको भनाइ छ । सुशासन कायम गर्न र भनसुन चल्दैन भन्नका लागि पनि यस्तो लेखिएको प्रहरी कार्यालयले जनाएको छ ।

‘सामान्य घटनामा दबाबका लागि आफन्त, राजनीतिक दलका नेता तथा भीडभाड देखाउन खोज्ने प्रवृत्तिका मानिसका लागि यस्तो लेखिएको हो,’ जिल्ला प्रहरी प्रमुख एसपी राजेन्द्रप्रसाद भट्टले भने, ‘प्रहरीलाई स्वतन्त्र किसिमले अनुसन्धान गर्न र पक्ष–विपक्षीले पनिआफ्ना कुरा निर्धक्क भन्न सकून् भनेर अनावश्यक मानिसलाई छिर्न नदिन यस्तो लेख्नु परेको हो ।’

प्रहरी कार्यालयभित्र सीधै बिचौलिया प्रवेश गर्न सक्दैनन् । गेटबाहिर पक्ष र विपक्षीलाई घटना मिलाइदिने भन्दै घटनासँग सम्बिन्धित व्यक्ति खोज्ने गिरोह पनि सक्रिय छ । गिरोहले विभिन्न राजनीतिक दल, व्यापारी तथा प्रहरी अधिकृतको नाम लिएर घटना मिलाइदिने वा आफ्नो पक्षमा निर्णय गराइदिने भन्दै रकम असुल्ने गर्छन् ।

विपन्न समुदाय र अशिक्षित व्यक्तिका घटनामा बिचौलियाले बढी चलखेल गरेको पाइन्छ । प्रहरीका अगाडि आएर बोल्न डराउने र आफ्ना कुरा प्रस्टसँग राख्न नसक्ने देखेपछि बिचौलियाले चलखेल गर्ने गरेका छन् । गेटमा नै बिचौलियालाई प्रवेश निषेध लेखिएको देखेपछि प्रहरीलाई प्रलोभनमा पार्न प्रहरी कार्यालयभित्र जान लागेका बिचौलियाको मनोबल घटने विश्वास लिइएको छ ।

परासीका अमृत गुरुङका अनुसार घटना मिलाइदिने, भनसुन गर्ने नाममा केही व्यक्ति प्रहरी कार्यालयको गेटबाहिर विभिन्न बहानामा बसिरहेका हुन्छन् । ‘चिया खाने, आफन्त भेटने बहानामा घटना बुझ्ने र पुलिस प्रशासनमा गएर मिलाइदिने भन्दै बार्गेनिङ गर्नेहरूका लागि प्रहरी कार्यालयको गेटमा नै प्रवेश निषेध लेखेर ठीक गरिएको छ,’ उनले भने, ‘प्रहरी हाम्रो साथी, मुस्कानसहितको सेवा र समुदाय प्रहरी अभियानलाई साँच्चै व्यवहारमा उतार्ने हो भने देशैभरिका कार्यालयमा यसैगरी बिचौलिया रोक्ने प्रयास गर्नुपर्छ । यसले बिचौलियाको गतिविधि पूर्णत: नरोकिए पनि कमी भने अवस्य हुनेछ ।’

कान्तिपुरमा समाचार छ ।