लागूऔषध नियन्त्रणमा नवलपुर प्रहरीलाई फेरी सफलता/चालु आर्थिक बर्षमा ४८ जना पक्राउ

विजय चालिसे

कावासोती । भारतसँग सिमाना जोडिएको नवलपुर जिल्ला लागूऔषधको ट्रान्जिट बन्दै गएको छ ।जिल्ला प्रहरी कार्यालय नवलपुरका प्रमुख प्रहरी उपरीक्षक रमेश थापाले सोमबार आयोजित पत्रकार सम्मेलनमा भारतसँग सिमाना जोडिएका खुला नाकाबाट लागूऔषध ओसारपसार भएको अनुसन्धानबाट खुलेको जानकारी दिए । प्रहरी प्रमुख थापाले चालु आर्थिक वर्ष २०७५ र २०७६ को साउनदेखि पुस ९ गतेसम्म पाँच महिनाको अवधिमा लागूऔषध कारोबारमा संलग्न ४८ जना पक्राउ परेको बताउँदै उनीहरुका साथबाट डाइजेपाम ८८४ एम्पुल, फेनारगन ९०१ एम्पुल, नुफिन ७९४ एम्पुल, टालजेसिक ९४ एम्पुल, नाइट्रोसन २२० ट्याबलेट, नाइट्रोभ्याट दुई हजार ५०० ट्याबलेट, स्पास्मो ४२६ ट्याबलेट, फेन्सेडिल २०० बोतल र गाँजा ७४० ग्राम लागूऔषध बरामद भएको बताए ।

प्रहरीको गस्ती र चेकजाँचका क्रममा आगूऔषध ओसारपसारमा पक्राउ पर्ने गरेको बताउँदै प्रमुख थापाले भैरहवा, महेषपुरको ठुटीबारी र त्रिवेणीको भैसालोटनलगायतका स्थानीय खुला सिमानाकाबाट लागूऔषध भित्रिने गरेको बताए । उनले जहाँ प्रहरीको उपस्थिति कम रहेको र सुरक्षा जाँचको ग्याप रहेको ठाउँ छ त्यहाबाट ओसारपसारमा सक्रिय भइ आगूऔषध भित्रिए पनि विभिन्न ठाउँमा पु¥याउन प्रयोग हुने बाटो पूर्वपश्चिम राजमार्ग भएकाले लागूऔषध ओसारपसार क्रियाकलापमा संलग्नलाई समात्न सफल हुने गरेको जानकारी दिए ।पत्रकार भेटघाट कार्यक्रममा आइतबार मध्यबिन्दु नगरपालिका–७ बाट पक्राउ परेका लमजुङ जिल्ला बेसीशहर नगरपालिका–८ का २० वर्षीय सुब्वा गुरुङ, काभ्रेपलाञ्चोक मन्दन गाउँपालिका–४ का २१ वर्षीय सागर ढकाल र खोटाङ जिल्ला माग्पा गाउँपालिका–५ का वर्ष २१ का विनोद राईलाई अदालतबाट म्याद थप गराई अनुसन्धान अगाडि बढाइएको जानकारी दिए ।

लमजुङका सुब्बा गुरुङबाट नुफिन ५१ एम्पुल, फेनारगन ६१ एम्पुल, डाइजापाम ५९ एम्पुल र प्रयोग भइसकेको सिरिन्ज एक थान बरामद भएको छ । उनी पश्चिमबाट पूर्वतर्फ आउँदै गरेको लु २ ख २६६७ नम्बरको बसमा सवार थिए । त्यस्तै, सागर ढकाल र विनोद राईको साथबाट नुफिन ९ एम्पुल, फेनारगन ९ एम्पुल, डाइजापाम ९ एम्पुल र नाइट्राभेट १० लेखिएको ३११ ट्याबलेट फेला परेको हो । उनीहरु पनि पश्चिमबाट पूर्वतर्फ आउँदै गरेको ना ५ ख ७६३३ नम्बरको बसमा सवार रहेको जिल्ला प्रहरी कार्यालय नवलपुरले जानकारी दिएको छ । थापाका अनुसार लागूऔषध कारोबारमा संलग्न अधिकांश नवलपुर बाहिरका रहेका छन् । चालु आर्थिक वर्षको मंसिर मसान्तसम्म जम्मा २३ वटा लागूऔषधका मुद्दा दर्ता भएकोमा ११ वटा पर्छौट भएको र १२ वटा अनुसन्धानमै रहेको बताइएको छ ।