२०८२ बैशाख २५, बिहिबार

ट्रकभित्र फल्स बटम राखेर तस्करी, चरेससहित चालक समातिए

नमुना पोष्टप्रकाशित मिति: २०७५ पौष १६, सोमबार (६ साल अघि)

वीरगञ्ज । पर्सा प्रहरीले चरेससहित एक जना ट्रक चालकलाई पक्राउ गरेको छ । मकवानपुरको हेटौंडा उपमहानगरपालिका–१२, पदमपोखरीका २९ वर्षीय सागर बललाई वीरगञ्ज महानगरपालिका–३१, बेल्वाबाट प्रहरीले नियन्त्रणमा लिएको हो ।

जिल्ला प्रहरी कार्यालय, पर्साका प्रहरी उपरीक्षक रेवती ढकालले ना ४ ख २९८५ नम्बरको ट्रकको बडी र क्यावीनको फल्स बटम बनाएर राखिएको १ सय ६० किलो चरेससहित ट्रक र यसका चालकलाई नियन्त्रणमा लिएको जानकारी दिए ।‘ट्रकभित्र फल्स बटम बनाएको पाइएको छ । लामो समयदेखि ट्रकलाई यस्तै अवैध काममा प्रयोग गरिएको पनि हुन सक्छ’, प्रहरी उपरीक्षक ढकालले भने ‘योपटक प्रहरीलाई ठूलो सफलता मिलेको छ, थप अनुसन्धान पछि अन्य कुरा खुल्छ ।’

विशेष सूचनाका आधारमा चरेस बरामद गरेको प्रहरीले संलग्न व्यक्तिबारे खोजी भइरहेको जनाएको छ ।

फल्स बटम बनाएर चरेस ल्याएका ट्रक चालक बलले ६० हजार भाडा दिने भनेपछि चरेस बोकेको वयान प्रहरीसमक्ष दिएका छन् । यद्यपि, उनले पहिलोपटक यसरी चरेस बोकेको दाबी गरेका छन् ।