नवलपुरका प्राविधिकले प्रधानमन्त्रिलाई ज्ञापन पत्र बुझाए

कावासोती । नेपाल कृषि तथा भेटेरीनरी प्राविधिक हकहित संरक्षण समिति नवलपरासी पूर्ब नवलपुरले प्रधानमन्त्रीलाई ज्ञापन पत्र बुझाएका छन् ।
शुक्रबार जिल्ला प्रशासन कार्यालय नवलपरासी पूर्ब मार्फत प्रधानमन्त्री तथा मन्त्रिपरिषद्को कार्यालय सिंहदरबारलाई ज्ञापन पत्र बुझएको नेपाल कृषि तथा भेटेरीनरी प्राविधिक हकहित संरक्षण समिति नवलपुरका कार्यवाहक अध्यक्ष मनोज चापागाईले जानकारी दिए । २ बुदे माग सहित प्रधानमन्त्री तथा मन्त्रिपरिषद्को कार्यालयलाई ज्ञापन पत्र बुझाईएको हो । एक गाउँ एक कृषि तथा पशु सेवा प्राविधिक संचालन निर्देशिका २०७३ बमोजिम विज्ञापन गरी लोक सेवा आयोगको मापदण्ड (लिखित र मौखिक) का आधारमा छनौट भएर हाल स्थानिय तहमा खटिएर गएका एक गाउँ एक कृषि तथा पशु सेवा प्राविधिकहरुलाई स्थानिय तहमा स्थायी दरबन्दी कायम गरी स्वत स्थायी गराउनु पर्ने उनिहरुको माग रहेको छ ।
त्यस्तै उनिहरुले तत्काल नेपाल निजामती सेवा ऐनको परिमार्जनको चरणमा रहदा निजामती सेवा ऐनको दफा ८ मा राप.अन.द्धितिय पद नरहने व्यबस्था गर्न खोजिएकोले हाल सम्म प्राविधिक बिषयमा अध्ययन पुरा गरेका कृषि, भेटेरीनरी, अमिन लगायतका प्राविधिक पद कायम गरी खुल्ला विज्ञापन मार्फत पदपूर्ती गराउनु पर्ने माग राखेका छन् । एक गाउँ एक कृषि तथा पशु सेवा प्राविधिक सृजना भए पश्चात देश भरी नै कृषि क्षेत्रमा उल्लेख्य सुधार हुनुका साथै कुल ग्राहस्थ उत्पादनमा बृद्धि भएको भन्दै आफ्ना मागहरु तत्काल पुरा गर्ने प्रधानमन्त्रीलाई आग्रह गरेका छन् । अहिले नेपाल सरकारले कर्मचारी समायोजन अध्यादेश २०७५ मार्फत कर्मचारी समायोजन गर्ने प्रक्रियामा रहदा एक गाउँ एक कृषि तथा पशु सेवा प्राविधिकको बिषयमा कुनै कुरा उल्लेख नभएको तत्काल एक गाउँ एक कृषि तथा पशु सेवा प्राविधिकको व्यबस्थापनका लागी जोडदार माग गरेको नेपाल कृषि तथा भेटेरीनरी प्राविधिक हकहित संरक्षण समिति नवलपुरका कार्यवाहक अध्यक्ष मनोज चापागाई बताए ।